Kagawasan gipasipad-an

Hunyo 12, 2024. Ika-126 ka tuig nga kasumaran sa Philippine Independence Day nga gibilin sa atong mga bayani. Dapat, maoy makita sa matag panagway sa katawhan ang kalipay samtang nagmontar og dugtongdugtong nga mga lamesa-kan-anan gikan sa Luzon ngadto sa Mindanao aron saw-an ang lamiang pagkaon agig selebrar-pasalamat sa kagawasan nga atong naangkon.

Apan subo pamalandongan. Kay ultimong kinabaratohang sud-an, usahay wala gyoy ikapalit ang kinapobrehang pamilya.  Nan, unsa man intawong pagkaona ang ilang ikatungtong sa kan-anan agig pakigduyog ning atong pagsaulog?

Busa, inay maoy masaksihan, nga ang mga pobre ug dato masadyang naghinungitay sa matag usa, may pundok gayud sa mga dismayadong katawhan, kinsa magmartsa sa kadalanan samtang nanagdala'g plakards nga gisulatan og mga dagkong letra agig padayag sa tinuoray nilang gibati human hiwaa ilang kasingkasing sa kapalpakan-kabastosan-kagarapala'g dinad-an sa adiministrasyong Marcos diha sa ilang paghupot  sa renda, diin nakapaalarma kay daw mopaingon  na sa dakong bung-aw sa atong kaalaotan.

Gani, sa miaging Hunyo 2, 2024, naghinangat pa ang Philippine Independence Day, didto sa New York, ang Hakbang ng Maisug (HNM)-USA ug ang diehard Sara Duterte Supporters-New York nagkahiusa  nga magkatigom ubos sa Hakbang ng Maisug-Philippines, guest speaker Atty. Vic Rodriquez, diin pagka-ugma, Hunyo 3, sila malinawong nagmartsa sa halapad nga dalan sa Manhattan, diin wala gyod mapugngi sa administrasiyong Marcos,  busa gawasnong nakapalanog sa ilang protesta batok sa wala na magustohi nilang pangulo.

Hasta OFWs sa Japan ug sa lainlaing nasud nadasig sa pagpahigayon usab og sunodsunod unyang HNM rallies. Sanglit atua  tuod sila mag-estar sa gawas, apan apektado gihapon. Kay naa baya ilang pamilya sa Pilipinas. Usab, sila mga botante. Busa, importanting magpakabana.

Nindot kon didto sila mag-rally. Kay dili madiktahan ni PBBM-FL Liza Araneta-Marcos ang mga opisyales ug kapolisan. Ug dili sab pamutangan og mga dagkong sakyanan ang venue sanglit girespeto ang atong freedom of speech and of expression nga kabahin sa atong Nasudnong Kagawasan.

Kagawasan nga hagbay rang gipasipad-an sa mga Marcos. Sa amahang diktador ug sa anak nga labaw pa sa diktador. Ang makapahiubos, kay kini silang midaogdaog-miabuso ug gustong moulipon kanato, dili mga langyaw, kondili, mga kadugo ra usab nato. Makaipsot pa kaha kita ning giatubang tang kakuyaw?