Ang manok

Nakita sa social media ang paghusay ni Basak Barangay Captain Dave Tumulak sa magtiayon nga nag-away tungod sa wa nila pagsinabtanay.

Ang husay nga gihimo ni Kapitan Dave Tumulak sa Barangay Basak ning dakbayan sa Sugbo iyang gi-video ug gi-post sa iyang Facebook page o social media account. Ang post sa kapitan aduna kini 242 ka mga komento ug 509 ka mga hearts ug likes

Dinhi atong nahibaw-an nga ang bangi nagsugod sa dihang giposposan sa asawa ang manok sa iyang bana tungod kay mas giseguro pa kini kay sa gatas sa ilang anak.

Matud pa sa asawa nga mas maayo pa ang manok kay maoy unahon sa paghapohap kay sa iya ug sa ilang anak. Dugang pa sa asawa nga mas maayo pa pod ang motor sa iyang bana kay mao ni ang kanunay nga unahon niya sa pagkabayo. Sugarol ang iyang bana.

Tungod sa iyang kalagot nga wala magpalit og gatas ang iyang bana kay giseguro ang puhonan sa pagpanugal, iyang giposposan ang manok.

Hinuon, gipanghimakak sa bana ang pasangil sa asawa pero wala siya kapasabot kun ngano nga unahon niya sa paghapohap ang manok ug kanunay niyang kabayan ang iyang motor kay sa iyang asawa. Pastilan gyod ning sugal.

Pero sa laing bahin, sakto ba ang gihimo ni Kapitan Dave Tumulak nga iyang gi-video ang iyang paghusay sa magtiayon nga nag away ug iya kini nga gi-post sa iyang Facebook account?

Dili ba kini kalapasan sa pribadong kinabuhi sa magtiayon? Ang pag-video sa gihimong husay sa kapitan dili seguro kalapasan kay kabahin man kini sa record sa husay pero ang pag post sa video sa social media proper ba? Tubag kuno mo hingtungdan nga ahensiya sa gobiyerno. Kay wa pod ko kahibawo maong nangotana ko.