Ting-ulan na usab

Human sa pipila ka bulan nga grabeng kainit gumikan sa pagdagmal sa El Niño phenomenon, mipuli na usab ang ting-ulan. Gani sa milabay nga mga adlaw, sige na nga pag-ulan ang atong nasinati dili lamang sa Sugbo kondili lakip na sa ubang mga lugar sa nasud.

Ambot kon unsa kaha ka andam ang atong kagamhanan sa mga pagbaha dala unya sa mga bagyo. Sa kasaysayan sa Pilipinas, basta moigo na gani ang hulaw, sundan gayud kini sa grabe usab nga mga pagbaha.

Matud pa sa bulletin sa Philippine Atmospheric, Geophysical and Astronomical Services Administration o PAGASA, makapaabot kita og 13 hangtud sa 18 ka bagyo nga mohapak sa nasud human sa El Niño karong tuiga.

Bitaw, sa nanglabay nga pipila ka bulan panahon sa ting-init wala gyud ko ka bantay og massive preparations sa atong mga lokal nga kagamhanan sa Metro Cebu, ilabina sa dakbayan sa Sugbo, alang sa umaabot nga ting-ulan.

Gumikan niini, dili na usab nato ikatingala ang mga pagbaha sa Metro Cebu panahon unya sa mga pag-ulan. Kalbaryo na nato kini sa hataas na nga panahon, problema nga sa akong tan-aw mora’g wala na kasulbaran.

Ambot pa nganong dili gayud masulbad kining maong problema. Ambot pa nga sa ka daghan sa mga administrasyon nga nanglabay, wala gayud ma-improve ang sistema sa drainage sa kadalanan sa Metro Cebu.

So expected usab nga ang mga ordinaryong molupyo maoy grabe nga maapektohan niining maong problema, butang nga hagbay ra nilang giantos nga wala gyud hatagi og pagtagad sa mga hingtungdang opisyal ug ahensiya sa kagamhanan.

Bilyones ka pesos ang gikinahanglan alang sa modernization sa sistema sa drainage sa dakbayan sa Sugbo lamang. Dako kini nga kantidad. Apan kaya kini nga makab-ot. Ang gikinahanglan lamang mao ang political will sa atong mga lider.