Shabu giitsa, nag-itsa gipangita pa?

May 29, 2024. Miyerkoles sa gabii. Ang Task Force Davao (TFD) ug Davao City Police Office nakakonpiskar og 900 grams nga shabu, gibanabanang nagkantidad og Pl4.4M human mipahigayog regular passenger inspection sa Lacson checkpoint, Calinan District, Davao City.

Matud pa ni Col. Darreb Comia, TFD commander, adunay wala mailhing lalaki nga mibalik sa bus ug nakitang dunay gamayng box nga gilabay agi sa bentana ug nagtiniil lang nga mipalayo-ikyas. Dihang gisusi sa kapolisan, nasayran nga 900 grams shabu diay ang sulod, nga nakapagubot-nakapakuyaw sa mga pasahero ug sa mga namuyo sa duol. Sanglit, nagtuo nga bomba. Kini sumala pa sa MindaNews.com.

Kon ang senariyo maoy basehan, wala makonpiskar sa kapolisan ang shabu kay igo ra man nila kining gipunit human gilabay.  Ang makapahibulong kay may mga panggukod man unta silang sakyanan, kaubanang polis ug mga armas, unya nganong wala man nila lutosa taman sa ginhawa hangtod madakpan?

Nganong kontento na man sila sa ilang pasiatab nga padayon pa nilang gipangita ang maong suspetsado? Dili ba makahatag lamang hinuog ideya nga usa ra ka scripted drama ang maong hitabo?

Kay kanus-a ka ba makakita nga ang tigpayuhot og mga tonetoneladang shabu sama niadtong nahitabong Batangas Drugs Haul controversy, dili gyod magdalag armas ug adto pa moagi sa checkpoint aron magpadakop? Unya, kalit lang mahanaw ang dakponon? Sa administrasiyong Marcos ra gyod!

Ang pagpadalag binataliyong Special Action Force (SAF) sa siyudad sa Davao ug  pagpapha-relibo sa daghang opisyal sa kapolisan, kinsa maoy nakapahimo sa naasoyng siyudad nga  disiplinado, kinalimpiyohan ug safest city to live ubos sa pagpamunoan sa mga Duterte, dako kining insulto ngadto kang Davao City Mayor Sebastian ‘Baste’ Z. Duterte. Kay inay suportahan ni PBBM ang iyang war on drugs nga gikahadlokan sa mga drug lords, gikontra hinuon ni PBBM ug gusto pang piiton ang mga Duterte.

Unsa man gyod diay tumong ning pagpamunoan ni PBBM? Kalinaw sa nasod, o kagubot? Pagpuo sa illegal drugs, o pagpalipang?  Kapolisan nga unahon gyod ang paggukod sa miitsag shabu, o kapolisan nga unahon pagpunit ang shabu, ayha pa gukda ang nag-itsa?

Kataposang pangutana. Angayan pa ba siyang magpabilin sa iyang pagka pangulo sa Pilipinas, Brod/Sis?