EDITORYAL - Mga pagtulon-an wala na karon

Sa pagdagan sa mga katuigan, nagkadako ang kausaban sa kinabuhi sa tawo, partikular na sa mga Pilipino tungod sa nagkamodernong mga teknolohiya nga nakatabang og dako sa inadlaw-adlaw nga bulohaton.

Apil aning mga bulohaton mao ang pagkaon. Ang pagkaon makuha sa daghang pamaagi, apan tungod sa kapaspas na sa teknolohiya kasagaran instant na tanan apan nagtangag sab niini ang kwarta nga gikinahanglan aron kini mapalit.

Mao na kini karon ang gidak-an sa mga kabataan, ilabi na sa mga kabataan nga anha magpuyo ug nagtungha sa mga eskuylahan sa siyudad.

Dunay paspas nga transportasyon, bottled water, mga snacks nga gipakete ng daan, pagkaon nga linuto sa balay ug daghan pang uban nga usahay dili na gani maayo sa ilang panglawas.

Apan kun itandi sa mga tinun-an diha sa mga hilit nga lugar o sa probinsya, lahi ra kaayo. Simple ang kinabuhi ug dili tanan instant. Ang pagkaon gikan sa ilang tugkaran sama sa prutas, saging, kamote ug daghan pang uban.

Apil sa ilang nakat-onan kun unsaon kini pagtanom, pagpreparar, unsaon pag-ila, pagpangita ug pagkuha  ug uban pa aron kini mahimong pagkaon nga mabutang sa lamesa.

Ang kaniadto MECS o Ministry of Education Culture and Sports ug DECS o Department of Education, Culture and Sports sa wala pa nahimong DepEd,  adunay mga asignatura o subjects kaniadto nga gardening, home economics, carpentry, cooking ug bisan simpleng masonry sa elementarya.

Bisan tuod og ang uban niini gitudlo na sa mga ginikanan, gitudlo gihapon kini diha sa mga eskuylahan aron mapun-an pa ang kahibalo sa mga bata.

Apan karon, lahi na ang kurikulum sa mga tunghaan kay pulos na sakay sa panahon sa modernong teknolohiya sama sa computers, siyensiya ug matematika.

Mga kinahanglang makat-onan sa tanan sa panahon karon kay kun wala niini maglisod ang mga bata sa pagpadayun sa ilang edukasyon.

Sa panahon nga dunay katalagman, kinahanglan sa mga bata nga makahibalo og personal survival nga di magsalig sa ilang ginikanan, teknolohiya ug modernong gamit.

Angay itudlo pagbalik sa tanang mga bata ang mga karaang subjects sanglit walay makatag-an kun kanus-a nila kini magamit. Mas maayong dunay kahibalo nungka sa wala.