Batasan sa HNM vloggers kapanaminan

Makapanglimbawot sa balhibo ang kahimtang sa Pilipinas karon.

Kon sa mga nangaging namunoan, mga militanteng grupo, aktibista ug uban pang walhon libre rang makagamit sa Freedom Parks, karon, bisag ang Hakbang ng Maisog (HNM) Peaceful Rally pa ni former President Rodrigo R. Duterte maoy mousar, alihan gyod sa administrasiyong Marcos.

Makapahinuktok! Kaniadto sagad mag-rally, mga leftitst-pasaway. Kusog kaayong manglabayg bato, makigdumogay sa naglaray'ng kapolisan.

Pero karon, diin ang mag-rally, sobra ka masunoron ug kamahigalaon sa kapolisan, dili man hinuon nila pasudlog Freedom Park.

Angay hinumdoman.  Ang Pilipinas nahisama sa usa ka tibuok balay-patigayon, diin kita katawhang Pinoy maoy tag-iya.

Gikan sa kinaubsang mangangalagad ngadto sa kinatas-an, silang tanan panahon sa eleksiyon, diri kanato miaplay ug kitay nagpili kinsay dawaton?

Nan, niining higayon atong namatikdan nga imbes moganansiyag dako ang Pilipinas, nagsige hinuon tag pangutang kay gipangkorap ug na-mismanaged sa atong mga gipangpiyalan, pasagdan na ba lang diay nato sila hangtod kita ma-bankrupt?

Mao baya kini rason nganong nahimugso ang mga HNM Rally. Apan sakit palandungon.

Kay ultimong Freedom Park, diin kita katawhan ang tag-iya, gidid-an sa paggamit niini sa mga gipili ta mismong mga mangangalagad sa atong nasod sama sa nahitabo niadtong wala madayon nga May 25 Tacloban City HNM Peaceful Rally. Sanglit, gipamutangag daghang dagkong sakyanan ang Freedom Park ug gipaestaran pag mga polis.

Pero saludo ko sa mga HNM diehard vloggers: Tropang Bisaya, Pambansang Loyalista, Sir Coop Meet Up, Bisdak Pilipinas, VMR Channel gikan sa Luzon, Visayas ug Mindanao, kinsa pulos intawon nag-sariling sikap aron lang makaadto ug mapasalida pinaagi sa ilang vlogs ang tinuorayng panghitabo sa maong kalihokan.

Nainterbiyu nila ug sa taga-SMNI ang organizers, kinsa dismayadong misaysay giunsa sila pagpiit-paglisodlisod sa local officials, kinsa mihimo sa Freedom Park nga Car Display Center aron dili magamit.

Ang pagpakitag walay kaluya sa HNM vloggers diha sa ilang paghatag og libreng serbisyo sa katawhan, ulan man o init, bulawanong batasan kini nga kapanaminan.

Kay kon si Jose Rizal, pinaagi sa iyang tinta ug mga sinulat: Noli Me Tangere ug El Filibustirismo, siya nahimong bayani, ang vloggers, pinaagi sa ilang camera ug vlogs, maisip usab nga modern heroes.

Kaninyo amigo, saludo ako!