Divorce dili solusyon
Anaa na karon sa mga kamot sa mga senador ang bola sa giaprobahan sa mga kongresista nga Divorce Bill. Buot ipasabot, anaa sa mga kamot sa mga senador ang kapalaran sa Divorce Bill. Ila ba kining buhion o ila ba kining patyon ug ilubong. Sa milabay nga semana, ang mga kongresista sa boto nga 131 pabor, 109 supak ug 20 wala mobotar miaprobar sa Divorce Bill sa ikatulo ug kataposan niining pagbasa.
Sa aprobado nga Divorce Bill, ang mga basihanan sa pagpa-anular, pagpa-nulify o pagpaway bisa ug legal separation giipon o giusa. Naglayat-layat sa tumang kalipay ang mga pabor sa Divorce Bill tungod sa pagka aprobar niini samtang ang mga misupak nagminghoy.
Usa sa gihimugatan nga rason sa mga pabor sa Divorce Bill ang ka mahal sa pagpa-anular sa kaminyoon niadtong mga magtiayon nga dili na mahilot ang bangi ug relasyon sa ilang panagtipon. Laing rason ang pagbuwag sa magtiayon kansang bana o asawa biktima sa abusong pisikal, moral ug ekonomiya.
Kun kini lang gyod ang mga rason, dili gihapon kini sulbad sa suliran. Kun aprobahan man lang ang Divorce Bill tungod kay mahal ang pagpa-anular sa kaminyoon, makapabarato ba ang Divorce Bill?
Sa aprobado nga Divorce Bill, ang mopahimulos niini kinahanglan gihapon nga moadto sa hukmanan aron ipa-divorce ang iyang kaminyoon. Sa pagpa-anular sa kaminyoon ang kasagaran sa mipahimulos niini mobayad og P200K nga acceptance fee sa abogado. Wala kini labot sa bayad sa abogado matag tunga niya sa husgado alang sa pagtambong sa kaso. Buot bang ipasabot sa mga pabor sa Divorce nga paubsan sa mga abogado ang ilang pangayoon nga acceptance fee niadtong gustong makig-divorce sa ilang kaminyoon?
Sa hisgotanan nga abuso, bout bang ipasabot sa mga pabor sa Divorce nga ang pagka abusado sa bana o asawa mawala na kini kanila human sa ilang Divorce?
Mawala ba ang pagka abusado sa bana o asawa? Ang pagka abusado sa tawo kabahin na kini sa iyang personalidad. Kun magminyo sila pag usab, mawala na ba ang ilang pagka abusado. Dili ba ato silang gitugotan nga makahimo pa og daghang biktima? Isip-isip?
- Latest