Lihoka na

Kagahapon, nakaagi ko pagbalik sa mga dapit diha sa Taboan District, ilabi na sa Lakandula Street, B. Aranas Street ug Tres de Abril Street.

Nakapanglingo-lingo ko pagkakita sa aseras sa Lakandula Street kay nahitabo na gyud ang akong gikabalak-an kay ang aseras atubangan sa Taboan Market, gikural na og puthaw.

Kaniadto, ang aseras gikural-kural pa lang og mga lipak sa kawayan, dili na maagian og tawo. Suhito ko sa maong dapit kay kaniadtong 1970s, lapad pa kaayo ang aseras dihang dapita.

Sa daghan na nakong mga lindog sa newspaper, miingon ko nga kon dili kini matagad, moabot ang higayon nga kining mao nga aseras kuralon na og semento.

Pagka karon, gikan sa kural nga lipak sa kawayan, nahimo na nga puthaw ang kural ug gipintalan na. Kon magtukod ka gani og mga building ug panimalay daplin sa karsada, duna gyuy aseras.

Apan tan-awa ra gud ninyo diha sa Lakandula Street, B. Aranas Street, Tres de Abril Street, ug apil na ang ubang aseras sa mga karsada diha sa Taboan District, gipang-ukupar na sa mga tawo nga hangol og pwesto ang aseras.

Mabadlong man unta kini kon ang mga kawani sa kagamhanan nga gitugyanan sa maong gimbuhaton nagtrabaho pa sa ilang tahas. Apan unsaon man, gipasagdan ra man nila.

Kaniadto ang Cebu City government dunay gitawag og Demolition Team, dayon nausab ang ngalan ug gihimong Squatters Prevention Encroachment Elimination Division, dayon gihimo na usab nga PROBE, kun Prevention Restoration Order, and Beautification Enhancement.

Sa SPEED anaa ang pulong “Encroachment Elimination” ug sa PROBE naa sab ang pulong “Prevention, Restoration” apan nakapatuman ba sila? Ang tubag, wala.

Wa ko magtumbok nga ang nagpabaya ang mga nagdumala lang sa PROBE karon, apil na kadtong mga nangaging hepe sa Demolition Team ug SPEED kaniadto.

Apan gihimo ko kining mao nga lindog aron sa pagdasig sa mga nagdumala sa PROBE karong higayona, sila si Retired General Aderson Comar ug Sir Kevin Sanchez nga mohimo sila og dali nga aksyon niining maong pangabuso.

Kon dili gud nato aksyonan kining mao nga pangabuso nga ukopahon nila ang mga aseras, moabot ang higayon nga hasta tingali ang karsada, mahanaw na kanato.

Si Mayor Michael Rama nagbalik-balik gyud nga gusto niya nga ang mga aseras, ibalik gyud sa publiko. Apan matuman kaha ang “vision” sa mayor kon ang mga tawo nga gitugyanan niya sa maong gimbuhaton wa mohimo sa ilang tahas?

Ang PROBE Team dunay kapin sa 100 ka gatus ka mga sakop, siyaro og dili sila makahimo og aksyon niini? Kadtong eskina B. Aranas ug Lakandula, Botica Saint Mary na nga gipanag-iya sa akong Lolo, lapad kaayo’g aseras kaniadto. Pero karon ang aseras gikural ug gisemento na hangtud sa gutter sa karsada.