Nyor Rudy Villanueva

Seminarista pa ko, nahimong baniog na gyud ang ngalan ni Msgr. Rudy Villanueva. Naila usab sa mga pen names sama sa Budoy Bagumbayan, Renato E. Madrid. Ang henyo luyo sa Cancionero Cebuano, 24 Masses Salterio Cebuano ug Uban pa.

Siya usab ang nagtagik sa honi ug letra sa Gozos ni San Pedro Calungsod. Nahimo siyang inila sa iyang mga obra nga mga nobela usa na niini ang “Mass for the Death of an Enemy!” higala sila ni Monsenyor Yap usa ka pintor ug gani mao man ang nagdesinyo sa kasamtangang San Carlos Seminary College.

Sa laktod, usa ka bahandi si Monsenyor Rudy alang sa atong lokal nga simbahan. nitaliwan man siya apan nagbilin siya og legasiya diha sa atong  liturhikanhong musika. Si kinsa gud ang dili bation og pagtahud ning maong henyo. Sa iyang kinabuhi buot niyang ihatag ang best ug dili siya buot nga ang iyang mga estudyante dili mohatag sa ilang best. Dili mantinilan ang Ginoo ingon tang pulonga. Tugoti ko nga itagik ang hamubong balak alang kanimo.

Lapyahan

Nagpungasi ang mga balud

Daw sa tanlag niunlod

Mga tingog nga nihimo og honi

Sa alimpatakan sa tawhanong kinabuhi

Dili man tuod hingpit ni timgas ang pagkatawo

Apan bulawanon ang talento nga hinatag sa Ginoo.

Ang gitara kun tugtogon daw lingganay nga nagmalipayon

Kay sa langit mga awit nga tinagik tukaron mo sa hingpit

Salamat sa panagtagbong dalikyat

Apan ang handumanan mo sa among galamhan dili gyud malangkat!

Pahulay Nyor Rudy wala matapos ang imong kinabuhi

Sanglit ang kamatayon pagkahimugso man ngadto sa eternidad!

In Pace Requiescat!