Martin miapas, gakaskas

Pobre kaayo ang Pilipinas. Nagkaanam na kadaghan ang gigutom. Nga mao untay dapat tutokan sa administrasiyong Marcos ug pangitaag mga epektibong paagi sa pagsulbad.

Apan unsa bay gibuhat ni Presidente Bongbong Marcos (PBBM), cabinet members, First Lady Liza Araneta Marcos ug ambisyosong House Speaker Martin Romualdez?

Nagsige rag pangaway-pangdaot sa mga Duterte. Ultimo si Vice President Sara ‘Inday’ Z. Duterte-Carpio, kinsa nagtinarong sa pagtrabaho isip Bise Presidente ug Department of Education secretary, gitabangan nilag gukod-labay og mga hugawng isyu aron wala nay makababag sa ilang daotang tumong.

Ang pagpakita ngadto sa publiko unsa ka bastos ang Unang Ginang Liza ngadto kang VP Inday matag estate visit sa presidente, pulidong kamatuoran kini nga ang Unang Pamilya, wala makaila og utang kabubut-on nga nahatag sa mga Duterte kanila. Ang grabe ka subsob estate visits ni PBBM uban sa iyang mga entourage, nga walay klarong return on investment, nagpaila lamang unsa sila kausikan.

Pag-adto ni PBBM-FL Liza ug ilang entourage didto sa Brunei, Mayo 28-29, 2024, si House Speaker Martin Romualdez, kinsa didto sa New York, miapas nila ni PBBM gamit ang usa ka private jet plane aron makig-uban sa padayon nilang pag-usik-usik sa salapi natong magbubuhis, nga sagad ipasumangil o ipaagi lamang og usa ka official state-visit.

Ang pag-abot sa maong gisakyang private plane ni Martin sa Brunei airport, kinsa tahor kaayog linaktan, gi-post sa Philippine Embassy to Brunei Facebook page, pero daling gi-delete ug dili na makita.

Maayo na lang, na-saved sa usa ka OFW vlogger, kinsa puwerte pong nakasaway sa gihimo ni Martin.

Kay samtang nag-antos kuno sa kagutom ang milyonmilyong pobre sa Pilipinas, ang feeling president ug miyembro sa Royal Family nga Romuadez, nagpahayahay!

Unsa ba ka dako ang papel ni Martin sa mga state-travel ni PBBM? Dili ba mapirmahan ang pledges, Memorandum of Understanding ug ubang sagradong dokumento sa duruha ka nagkasabot nga lider kon wala siya?

Pastilan, imbes magpanday siyag balaod nga makatabang pagsulbad sa kagutom ug makatambal sa nagkutoyng tiyan sa mga kabos, iya man hinuong gitiwasan, uy!

Ning pag-apas ni Martin, daghan ang gisakitan-nakapamalikas.

Kay sa salaping pinatud-ag singot-luha-dugo nga dili iyaha, siya gakaskas lang. Pagka-very insensitive nga tawo!