Maayong Balita
Sa katapusang higayon sa wala pa sakita ang atong Ginoong Jesus didto sa balabag sa Krus, ang atong Ginoo nakigsalo sa iyang mga tinun-an.
Natataw kaayo nato nga sa dihang nigunit siya sa pan siya nagkanayon: “Kini ang akong Lawas!” sa kalis nga nahimutangan sa bino siya nagkanayon:
“Kini ang akong dugo nga giula alang sa daghan!” kining maong kasinatian sa mga apostoles nagpahinumdom kanila nga niadtong panahona, wala lang sila manihapon hinunoa niadtong tungora gitukod sa atong Ginoo ang Sagrada Eyukaristiya ingon man ang Sagradong Orden sa Pagkapari. Ug kining maong buhat padayong gisubli hangtud karong mga panahona.
Kasinatian
Dili pa lang dugay nahimong host ang atong lokal nga simbahan dinhi sa Archdiocese of Cebu sa International Eucharistic Congress. Dugay ug gastoso ang maong preparasyon. Gani, nabalhin gyud ang St. John XXIII Seminary sa laing luna mismo sa Compound sa Archdiocesan Seminaries.
Daghang mga sessions nga naghisgot kalabot sa pagpamalandong sa Sakramento sa Eyukaristiya. Apan ang pangutana mao: Nakatuhop ba kin isa tagsa tagsa nato ka mga kasingkasing ug diwa? Nganong hangtud karon daghan man gihapon ang nangahas nga mopasipala sa balaang sakramento. Ang mga tawo sama nila ni Pura Luka Vega, Jayson Hiso ug kadtong estudyante sa usa Katolikong Tunghaan ang nihimo sa ilang review kunohay sa ostiya. Gani ang pinaka ngil-ad mao kadtong nihimo og pag drowing og kinatawo mismo sa ostiya. Kining mga butanga nakadugang sa pagpanamastamas sa Ginoo. Sa makadaghang higayon ato siyang gilansang ug sa makadaghang higayon ato siyang gisamaran!
Lihok
Apil sa mga Vigil of Reparations. Duawa ang adoration chapel sa Parokya ug pag-ampo nga matinud-anon agig pagpangayo og kapasayloan sa tanang natong mga sala batok sa santisimo sakramento. Dugang pa, andama ang imong kaugalingon sa dili ka pa mokalawat apil na niini ang pagkumpisal, ang eucharistic fast ug ang pagdawat sa Ginoo diha sa bayhon sa ostiya uban ang tumang pagtahud ug pagsimba. Dawata ang Ginoo pinaagi sa dila ug dili sa atong kamot.