EDITORYAL - Polis bodyguards sa mga Chinese

Dunay mga aktibong polis ang nangasakpang nag ‘moonlighting’ isip mga bodyguards o police escorts sa mga Chinese nationals. Ang uban kanila mga sakop sa Special Action Force ug Highway Patrol Group.

Nahitabo kini didto sa Mindanao ilabi na sa Davao ug sa kaulohan. Nasakpan nga kining mga polisa samtang nagserbisyo sa publiko, nag sideline sab isip bodyguards ug escort sa convoys sa mga sakyanan aning mga Chinese national. Dako kaayo ang kasagmuyo sa kadagkoan sa Philippine National Police sa pagkasayod aning gibuhat aning mga polisa. Siguro, dili lang gikan aning mga nahisgutang PNP units ang dunay mga sakop nga nag-moonlighting.

Sa ilang gihimo, mura og ilang gipakita nga gigamayan o gikuwangan sila sa ilang sweldo bisan og dagko na kini kun itandi gani sa uban pang mga kawani sa gobiyerno. Kani ilang giserbisyohang mga Intsik, nakasiguro kaha ning mga polisa nga kining mga tawhana nagtuman sa atong mga balaod?

Wala ba kaha sila nalambigit aning mga ilegal nga mga negosyo sama sa ilegal nga drugas, kaning kontrobersiyal nga Philippine Overseas Gaming Operation (POGO) nga giimbestigar karon tungod sa nagkalainlaing mga krimen nga gituohang nahitabo sa sud sa ilang mga compound?

Syaro naman lang, bisan delicadeza nalang sa ngalan nga aktibo pa silang mga polis sa katawhan, naglikay nalang unta sila.

Lain kaayo paminawon nga kaning mga Chinese nga maoy dayo dinhi sa ato mao pa hinuoy maghawod-hawod diha sa karsada anang ilang convoys nga mag-wangwang kay gikuyogan og polis gamit ang motorsiklo sa katawhan.

Kung tarong pa ni sila nga mga negosyante nganong magkinahanglan man sila og police bodyguards ug police escorts sa convoy?

Dili man ni sila kaha mga diplomatic officials sa China nga gipadala dinhi, nganong naa man silay police escorts ug police bodyguards? Wala man lagi mag-ingon ini ang ubang mga langyaw nga negosyante sab dinhi sa Pilipinas?

Gawas pa niini, wala ba makahibalo ning mga polisa bahin aning tension sa West Philippine Sea? Wala ba sila masayod nga Chinese ang nangilog sa teritoryo sa mga Pilipino? Husto nga sila imbestigahon ug silotan kun mapamatud-ang ilang gilapas ang ilang gipanumpaang kaakohan sa katawhan, ang “To serve and protect” ug dili para lang niadtong mga adunahang mga langyaw sama sa mga Chinese.