Init kaayong gipistahan sa social media ang kabahin sa diborsiyo. Lain-lain ang opinyon sa mga tawo, ang uban dunay maayong lohiko o gibase sa ilang kasinatian, samtang duna say uban nga taphaw ra kaayo, timailhan nga sila mismo wala pa makasuway og seryusong problema sa magtiayon.
Apan duna say uban kanila nga wala pa gyud sukad nagpakasal apan duna nay nakapuyo o partner sud na sa pipila ka tuig, apan sila mismo wala makasabot kabahin aning diborsyo. Samut na nga nakapalibog kanila kun ikumparar pa gyud ang annulment ug kining gitawag nga legal separation. Mao nga ang uban magpataka lang og komento bisan wala silay nasabtan.
Dili palang dugay, napasar sa Ubos Balay Balauranan ang Absolute Divorce Bill sa ikatulo ug final reading niini human nakakuha og 126 pabor ug 109 botos nga dili pabor samtang 20 ang abstentions.
Matud pa sa mga nagduso sa maong balaudnon, maghatag kini og alternatibong pamaagi sa mga tawong natanggong sa kasal bisan wala na siya o sila nagmalipayon.
Dinhi sa Pilipinas aduna nay gitawag og legal separation ug annulment. Ang duha parehong magpabuwag pisikal sa magtiayon kun ilang but-on.
Apan sa legal separation, pisikal lang sila magbuwag o dili na mag-uban og puyo sa usa ka panimalay o mag-uban sama sa normal nga magtiayon, apan ang ilang kasal pabilin nga legal ug dili sila mahimong magpakasal og lain.
Samtang sa annulment, pisikal nga magbuwag ang magtiayon ug ideklarar nga null and void ang legalidad sa ilang kaminyoon tungod sa mga balidong rason.
Medyo taas-taas ug gastuso nga proseso tungod kay molanat kini og katuigan ayha pa madesisyonan sa korte kun tugotan o dili.
Kinahanglan mapatud-an nga sa sinugdanan palang sayup na ang ilang pagminyo, sama sa pagpekete sa mga dokumento, edad, pangisip, pagpangilad, ug uban pa nga maoy nakaingon nga nakasal silang duha.
Apan sa diborsiyo, legal nga magbuwag ang magtiayon ug legal sab nga putlon ang ilang kaminyoon basta silang duha magkasinabot nga magbuwag ug mahimo silang makigminyo sa lain.
Ang Pilipinas nalang gawas sa Vatican ang nasud nga walay divorce law sa kalibotan. Panahon na ba nga makabaton niini ang Pilipinas?