Pagpaturagas og waldas
Wala pa mahatagig pulido-makatagbaw’ng tubag ang dugay nang panawagan sa katawhan, nga ablihan ang matag book of accounts sa mga kongresista ug senadores bahin sa binilyon-minilyon nilang tinuig nga confidential funds, diin by way of certification without official receipts ray gikinahanglan sa pag-liquidate pinaagi sa Commission on Audit aron unta tin-awng masayran asa mopaingon ang maong kuwartang nagagikan ug hinagoan natong mga magbubuhis?
Ang ‘Mel, parang sabaysabay tayo maging miliyonariyo’ issue nga nalitok gikan mismo sa baba ni First Lady Liza, diin naimbistigahan sa Senado kay halos kada semana may makadaog sa Philippine Charity Sweepstake Office (PCSO) lotto jackpot, nasakpang peke ra diay’ng gipang-post nga mananaog, timaang may gihimong dakong madyik si PCSO General Manager Mel Robles, kinsa, suod higala ni Liza. Maayo na untang pagkakorner si Mel ni Senador Raffy Tulfo. Pero, makapakurat. Kay pagkasunod hearing, kalit rang nahimong mabugnawon ang tuno sa tingog sa senador ug daw aso, kalit lang nahanaw ang kaso.
Dili mapugngan ang negatibong opiniyon sa publiko tungod sa maong gipakitang kuwestiyonableng taras sa Kongreso ug Senado. Sila nakapanglingolingo-tuaw: “Pagkakorap gayod sa atong gobiyerno karo!. Sila rang naa sa itaas ang nakapahimulos sa gahom, samtang mga kabos sa inhustisya nag-antos.
Apan tan-awa, unsay gibuhat ni PBBM ug FL? Taliwala sa dagko-daghang suliran sa nasod, atua, mi-state visit na usab sa Brunie Darussalam agig tubag sa inbitasiyon ni Sultan Hassanal Bolkiah (Mayo 28-29, 2024). Ug usab sila mopadayon ngadto sa Singapore (Mayo 30-31, 2024).
Tinuoray, may pinimirmahang pledges or Memorandum of Understanding tali sa atong pangulo ug sa lider sa mga naasoyng lugar nga makaayo sa atong nasod. Pero mga pulong ra kini kutob samtang wala pa makita sa buhat. Sa 24 na ka international trips ni PBBM sulod sa duha ka tuig niyang pagpamunoan, aduna bay dakong Return on Investment nga naani ang Pilipinas?
Ang nagakataas nga crime rate, uncontrolled prime commodities high prices ug nagakadakong unemployment problem sa Pilipinas, makamatuod nga walay maayong bunga ang mga state visit ni PBBM nga iyang nahatag sa katawhan.
Busa, maisip kining usa ka pagpaturagas-pag-usik-usik sa salaping gipatud-ag singot-luha-dugo natong tanang magbubuhis. Unta, mahinuktokan niya kini. Pero, kaantigo pa kaha siyang maluoy?
- Latest