EDITORYAL - Buslot sa PSA

Angay ikaalarma sa gobiyerno ilabi na sa law enforcement agencies ug sa militar kining mga nadiskubrehan sa nagpadayong mga Senate ug Lower House inquiries may kalabotan aning mga ilegal nga mga kalihokang naglambigit og mga Chinese nationals ug Filipino-Chinese.

Ang komitiba sa Senado dunay gipahigayong public hearing sa komitiba sa women, children, family relations, and gender equality ug sa Lower House committee on dangerous drugs, dunay daghang nadiskubrehang gituohang koneksyon sa mga Chinese nationals sa mga ilegal nga mga kalihokan dinhi sa nasud.

Ang mga gituki sa inquiries may kalabotan sa ilegal nga drugas ug kaning operasyon sa Philippine Overseas Gaming Operations (POGO) nga matud pa gi-operate ug gipadagan og mga Chinese nationals, ang uban kanila dunay mga kwestyonableng rekord, nalambigit sa mga krimen dinhi sa nasud ug sa ubang nasud.

Usa makapaalarma og maayo kaning pagkatawo ni Bamban, Tarlac Mayor Alice Guo kinsa gidudahan nga espiya sa China ug gidudahang nalambigit sa operasyon sa POGO nga nalambigit sa human trafficking, torture, rape ug extortion.

Ang mga nagpadagan sa POGO nga mga Chinese nationals nga dunay koneksyon sa nakalabay nga administrasyon.         

Nadiskubrehan sa inquiry pinaagi sa pag-imbitar sa Philippine Statistics Administration (PSA) diha sa hearing, nga kwestyonable ang mga impormasyon sa birth certificate ni Guo, ingon man ang pangangkon niini bahin sa iyang inahan ug sa iyang amahan.

Nasuta aning mga hearings nga dunay daghang mga langyaw, sagad mga Chinese nationals nga gituohang nakakuha og mga birth certificates sa Pilipinas.

Mismo ang PSA miangkon nga naabusar ang late registration kay pwedeng pulos bakak ang impormasyon nga ihatag sa resource person para makakuha og birth certificate.

Bisan kinsa nga langyaw pwedeng mogamit og pangalang Pilipino aron makakuha og birth certificate.

Kaning birth certificate usa sa mga importanteng dokumento nga pangitaon o rekisito sa halos tanang legal ug opisyal nga mga transaksyon sama sa pag-aplay og passports, insurances, mga ayuda, scholarships, driver’s license, SSS, PagIbig, PhilHealth, pagpalit og mga tituladong luna ug daghan pang uban. Posible pa gani nga sila makasulod sa militar o sa kapolisan ug uban pa.

Epektibo kini nga paagi aron magtanom og espiya. Maayo tingaling susihon kun unsa na ka lawom ang gamot sa China diha sa sistema sa Pilipinas.