EDITORYAL — Ang balaod maoy masunod

Usa ka dakong hagit sa kagamhanan sa Dakbayan sa Sugbu ilabi na sa buhatan nga gitahasan sa paghawan sa mga sapa gikan sa mga nakaali sa natural nga agianan ang kaning mga establisamento nga magmagahi pagtuman sa balaod.

Nagmalampuson na unta ang Task Force Gubat sa Baha sa siyudad sa Sugbu nga giporma sa suspendidong mayor nga si Mike Rama sa paghawan sa mga kasapaan sa siyudad gikan sa mga informal settlers.

Gani ang uban kanila gihatagan na og relocation site aron didto na sila mopuyo nga luwas inay sa mga kilid sa mga sapa nga peligro kaayo panahon nga kusog ang pagbunok sa uwan.

Sa mga nakalabay nga katuigan, duna nay mga panimalay daplin sa sapa uban sa mga namuyo niini ang gianod ug duna gyuy nangamatay dihang misaka ang tubig. Dili ra kaayo lisod bisan dunay uban nga nisupak ang paghawan sa mga sapa gikan sa mga informal settlers, apan dako karong hagit para sa siyudad kining mga establisamentong maka-afford og mga de kampanilyang abogado aron makiglalis sa lehitimong kamandoan sa siyudad.

Tinuod milyones ang gastos aning maong mga establisamento pagtukod nila aning ilang mga buildings kilid sa sapa o diha mismo sa sapa.

Apan sala diay sa kasamtangang gobiyerno kun ang mga ahente niini kaniadto nga gitahasan sa pagbantay ug pagsigurong nasunod ang balaod wala mohimo og tarong sa ilang trabaho?

Sayud man gyud kining uban nga nakalapas na sila sa 3-meter easement zone nga gikonsiderar nga danger zone ug no-build zone, apan nganong nagtukod man gyud gihapon sila didto?

Bisan unsa pay rason, kun ang kaluwasan sa kinabag-an ang gitan-aw, wala untay konsiderasyon sa pagpatuman sa balaod. Kay kun mohatag og konsiderasyon sa usa, gamiton kining sumbanan sa uban nga nagmagahi sab sa pagsanong aron sab dili sila mapapahawa.

Kun mao nay mahitabo, kataw-anan na hinuon ang gobiyerno kay mopilo man ang tuhod ug dili makapatuman sa kung unsay naa sa balaod.

Pananglit, kaangayan lang maoy gipangayo sa maapektahang establisamento, ihatag unta kini sa siyudad nga walay pagukon-ukon basta nasubay sa balaod apan dili ikompromiso ang katuyoan sa maong proyekto.