Ako magauban kaninyo sa kanunay

Maayong Balita

Nindot ug angayan lamang nga saligan nato ang saad sa atong Ginoong Jesus sa wala pa siya mosaka sa langit ngadto sa iyang mga iyang tinun-an. Ang Saad nga magauban siya kanila sa kanunay.

Pagmatuod lamang kini nga ang pagtuo dili lamang usa ka  intelektwal nga pagtahan ngadto sa bisan unsa nga dili nato hisabtan. Hinunoa ang maong pagtuo usa man ka kalambigitan.

Matud pa nga diha sa pagpakiglambigit adunay panagtagbo tali sa mga duruha kun daghang mga tawo ug sa maong panagtagbo ang matag usa naghinatagay og kahulogan ingon man bili sa kada usa niini.

Sama sa atong Ginoo nga imbis mosunod lamang siya sa naandang paagi sa pagsunod sa balaod, iya kining gihatagan og linain ug makahuloganong kahulogan. Ang Dios dili Dios sa halayo hinunoa suod kaayo nga Dios. Sa maong kasuod siya nipasalig nga bisan kun wala na siya, padayon gihapon siyang mag-uban ug maggiya sa iyang mga tinun-an samtang tumanon niini ang mandato sa pagsangyaw sa maayong balita ngadto sa tanang suok sa kalibutan ingon man ang pagbunyag kanila nga motuo sa Ngalan sa Amahan, sa Anak ug sa Espiritu Santo.

Kasinatian

Naningkamot kita nga mamahimong BECized ang atong Parokya. Sa dakong tinguha nga himoon ang pagpaduol sa simbahan ngadto sa mga kabus atong gihimong masinati ang presensiya isip simbahan ngadto sa mga kabus. Ang mga misa ingon man debosyon atong gihimong kahimanan lamang aron mas mapakaylap ang Maayong Balita nga maoy sukaranan alang sa panagtapok ug pag-ampo nga kun tugotan sa Dios mobunga og mga maayong Buhat alang sa kaayohan sa kinabag-an.

Lihok

Apil sa Barangay sa Birhen, sa Prayer Warriors, sa Couples for Christ aron sa ingon mas mapalig-on nato ang atong kalambigitan ingon nga sakop sa Lawas Mistiko ni Kristo Jesus nga mao ang Simbahan. Ang Simbahan nga dili hingpit tungod kay kini gidumala ug gilangkoban sa mga tawo nga sama kanato. Apan sa laing bahin gipahimugso sukad sa adlaw sa Pentekostes diin ang matag usa nahimong nakasinati sa mga gasa kun Karisma nga sarang magamit diha sa pagpangalagad.

Pangamuyo

Tanan: Dios nga Amahan nga sa pagpadala sa Pulong sa Kamatuoran ug sa Espiritu sa kasantos nganhi sa kalibotan, mipadayag ka kanamong mga tawo sa imong katingalahan nga mga misteryo ihatag kanamo dinhi sa among pagpadayag sa matuod nga pagtuo ang pag-ila sa himaya sa tunhay nga Trinidad, ug pagsimba sa iyang kahiusa diha sa gahum sa iyang kahalangdon. Pinaagi ni Kristo imong Anak nga Buhi ug Hari uban kanimo ug sa Espiritu Santo, Dios nga usa hangtud sa kahangturan. Amen.