Admitido si Senador Juan Miguel Zubiri nga ang iyang pagdepensa sa gipasiugdahang circus ni Senador Ronald dela "Bato" Rosa pag-imbistigar sa giingong "leaked documents" gikan sa PDEA nga naglambigit ni Presidente Bongbong Marcos sa illegal nga drugas maoy nahimong hinungdan sa iyang pagkatangtang sa pwesto isip presidente sa Senado.
Napugos si Zubiri pagluwat isip Senate president niadtong Lunes human 15 sa 24 ka mga senador ang mipirma sa usa ka resolusyon aron siya tangtangon sa pwesto.
Ug tingali ang labing sakit alang ni Zubiri mao ang pagbudhi sa tawo nga iyang gilabanan.
Tingali wa gyud magdahom si Zubiri nga si dela Rosa usa ba diay sa 15 ka mga senador nga mipirma sa giandam nga resolusyon ni Senador Chiz Escudero, kinsa maoy mihulip niya sa pwesto.
Gawas nilang dela Rosa ug Escudero ang laing mga senador nga mipirma sa resolusyon mao ang managsuong Peter ug Piya Cayetano, Francis Tolentino, Lito Lapid, Ramon Revilla Jr., Bong Go, Robin Padilla, Raffy Tulfo, Jinggoy Estrada, Imee Marcos, Grace Poe, ug ang inahan ug anak nga si Cynthia ug Mark Villar.
Way kalainan si dela Rosa ni Brutus ug ni Judas Escariote sa kanhiay'ng panahon nga nagbudhi sa ilang mga higala.
Si Brutus nagbudhi ni Julius Caesar. Si Judas nagbudhi ni Kristo. Samtang si Bato nagbudhi ni Zubiri. Mao ni bugti nga kinahanglang bayran ni Zubiri sa iyang pagtugot nga babuyon ang institution sa Senado.
Way laing haum nga paghulagway sa imbistigasyon ni dela Rosa basi lang sa tabi-tabi ug way pasikaran nga pasangil gikan sa usa ka tawo nga labihan sab ka kwestiyonable ang kridibilidad.
Tulukibon hinuon ang pamahayag ni Zubiri nga ang iyang pagdumili pagsunod sa mando sa iyang gihulagway nga "powers that be" maoy nakaingon sa iyang gidangatan.
Kinsa may iyang gipasabot? Kun ang Malacañang iyang gitumbok unsaon paghubad ang suporta sa mga kaalyado ni kanhi presidente Duterte?
Posible kaha nga wala na mosubay sa script si Zubiri sa tinud-anay nga motibo sa imbistigasyon ni dela Rosa?
Kun mao, tinuod kaha ang pangangkon ni kanhi senador Antonio Trillanes nga ang tumong ug tuyo gyud sa imbistigasyon ni dela Rosa mao ang pagguba sa administrasyon isip kabahin sa propaganda aron mapalagpot sa pwesto ang presidente?