Contemplatives in action

Kini ang tema sa among gipahigayong Clergy Recollection kagahapon didto sa San Carlos Seminary College. Ang naghatag ning maong recollection mao man si Fr. Silvino Borres SJ.

Sa maoang pagpamalandong gipahimug-atan ang kamahinungdanon diha sa mga kalihukang pastoral nga dunay kalambigitan sa kinabuhing maampoon.

Kay ang bisan unsang lihok pastoral dili bunga sa maampoong pagpamalandong usa man ka dakong kapakyasan diha sa pagpakigsuod sa Ginoo. Kinahanglang pangitaon ang Dios diha sa tanang butang aron ang tanan makasinati sa Dios.

Kini ang mahinungdanon kaayo ang pagtubo sa kinabuhing espirituhanon uban ang mahinungdanong giya sa atong kinabuhi nga walay lain kondili ang Dios.

Sa akong panaw sa kinabuhi ingon nga pari, daghan ko og naalinggatan.

Usa na niini ang pagkasayod nga mahinungdanon ang relasyon sa Dios kaysa ang pagkab-ot og bisan unsa.

Mahinungdanon ang mahaduol kaniya kaysa pagkab-ot og bahandi, ug dungog. Kay mag-unsa man tuod kun makab-ot mo ang tanan apan nahimong pilde ang imong kalag.

Ang pagkugi alang sa Ginoo nahitabo tungod kay kita nahigugma kaniya dili kay gisangyaw nato ang atong kaugalingon aron kita mailhan. Gitawag kini og Me-nistry dili na Ministry.

Tungod kay ang tawo naman hinuon ang ilado dili na si Kristo.

Nahinumdom ko kun nganong ang mga Carthusians mas mopabor nga ang Dios maoy moumol ug mohimo og mga butang alang kanila ug dili sila ang mohimo og bisan unsa alang sa Dios kini tungod kay ang pagpakigsuod ngadto sa Dios usa naman ka dakong prebelihiyo ug grasya nga higugmaon nato ang Dios.

Si kinsa ra gud kita nga mopasabot mahitungod sa Dios?  Apan paghigugma sa Dios labaw sa tanang mga butang ug ang tinguha nga makigsuod kaniya usa naman ka dakong kalipay alang sa usa ka kalag.