EDITORYAL - Gigamit sa pangampanya?

Makahibulong nga duna gyuy pipila ka mga politiko nga galante kaayo manghatag og mga ayuda ug hinabang sa mga tawo ilabi na sa mga nasunogan, mga urban poor nga mga organisasyon, mga kalamidad ug daghan pang uban.

Sila nalang gyud pirme ang makita aning mga tapuk-tapok sa mga tawong dunay dawatonong ayudad diha sa mga nagkalain-laing barangay gymnasiums o mga evacuation centers. Wala na bay laing mga senador diha o mga magbabalaod nga motabang sa mga nagkinahanglan?

Kauban ni sila pirme kung asa ang Department of Social Welfare and Development manghatag og ayuda. Pirme sila ‘special guest speaker.’

Ang nakaparat, kay ang mga tawo nangadlawon og anha ug nagpaabot matabangan, ang uban wala pay pamahaw apan moabot ning “guest speakers” human na nakapaniudot sa hotel o kung asa sila gikan.

Ang mga tawong nagpaabot sa hinabang, nangagutman. Pero unsaon man kay nagkinahanglan man sila og tabang intawon gikan sa gobiyerno. Mao nga bahala nalang og mangapasmo.

Ini og maabot na gani ning ilang mga guest speakers nga politiko, diretso lamano-lamano, dayun saka sa entablado ug didto tag kapin usab usa ka oras ang diskurso pagpadayag sa ilang “dakong pagtagad” sa mga nanginahanglan mao nga “dunay giandam” nga ayuda para sa tanan ug pakapinan dayun nga dili sila kalimtan.

Unya ayha pa sugdan dayun ang pagpanghatag sa ayuda nga tagsa ka putos, kaniadto naa pa gyuy tatak sa dagway sa mga politiko nga speakers, unya diay sa sud dunay tatak nga DSWD ang uban sa mga gipanghatag.

Taas kaayo ang linya, taas kaayo ang oras sa pagpinaabot, unya pipila lang ka kilong bugas, de lata, noodles, sabon, ug mga ginagmay nga pagkaon ang madawat.

Kang kinsa diay gikan ang pundo para sa ayuda sa mga tawo, sa politiko o sa kwarta sa gobiyerno? Ngil-ad kaayo tan-awon kay mura og gigamit naman hinuon aning mga nakabentaha nga mga politiko ang mga ahensiya sa gobiyerno para sa ilang pangampanya og sayo.

Nganong dili lagi makaingon niana ang mga politiko nga di kaalyado sa naglingkod nga presidente? Wala man na kaniadto, ang ayuda gikan sa gobiyerno, ang ahensiya ra gyud unta nga gitahasan mao ang motunol ug dili ang mga politiko.