Husto ba nga gamiton nga rason kining nagkainit nga tensiyon sa West Philippine Sea aron dali-dalion nga papasaron sa Kongreso ang tinguhang himuong mandatory sa kolehiyo ang Reserve Officers’ Training Corps (ROTC).
Una niini, niadtong Disyembre 2022 napasar na sa House of Representatives ang ilang bersyon bahin niining maong balaudnon ug karon gipaabot nalang sa bersyon sab sa Senado nga Senate Bill 2034 nga papasaron.
Nabahin ang opinyon sa publiko kabahin aning maong balaudnon, una kining nitumaw sa panahon sa administrasyong Duterte.
Ang nag-una kuno nga rason, kulang na sa disiplina sa kabataan karong mga panahona ug pinaagi sa ROTC madisiplina gyud ang tanan.
Dili rason ang kabahin sa tensiyon sa WPS nga maoy matud pa gihimong rason karon sa mga pro-ROTC aron mapasar kini og dali.
Adtong panahon sa kanhi administrasyong Duterte, nakigsuod kini sa China ug gani dunay kontrobersyal nga matud “gentleman’s agreement’ kining gihimo tali sa liderato sa maong nasud bahin sa WPS.
Sa panahon ni Duterte, nakabuwelo og tukod ug nakompleto sa China ang mga artipisyal nga islang ilang gitukod sa sud sa teritoryo sa Pilipinas, daw gigapos ang mga kamot sa Philippine Coastguard, Philippine Navy ug Bureau of Fisheries and Aquatic Resources aron mokisikisi batok sa mga pagpanghasi sa China.
Kining mga reklamasyon gisupak ug gidangop sa gisundan niyang administrasyong Aquino ngadto sa Arbitral Tribunal diin gipaboran ang Pilipinas batok sa China bahin sa WPS.
Dili ikalimod nga dunay tension sa WPS karon, apan husto ba nga himuon kining maoy rason aron ibalik ang mandatory ROTC sa kolehiyo? Dako og matabang ang ROTC sa panahon nga dunay katalagman ug mga emerhensiya.
Apan dili ba diay matawag aron moserbisyo ang mga nagkuha og alternatibo sa ROTC nga mga gikan sa Civic Welfare Training Service ug Literacy Training Service (LTS) ubos gihapon sa National Service Training Program (NSTP)?
Dili ba daghan sa mga propesyonal karon sama sa mga doktor, engineers, ug daghan pa ang produkto sa LTS ug CWTS ug dili man mga badlungon, apan sama sa kadaghanan sa mga Pilipino andam moprotektar sa nasud kun kini gubaton.