Gininhawa

MAYO 19, 2024: Domingo sa Pentekostes

Mga Pagbasa: Buh. 2;1-11/Sal. 104/Gal. 5;16-25/John 20;19-23

Maayong Balita

Si Jesus nihimo og usa ka mahinungdanong gesture sa dihang nipakita siya sa iyang mga tinun-an ug kini ang paghuyop kanila Dungan ang pag-ingon:

Dawata Ninyo ang Espiritu Santo. Ang pulong Espiritu gikan sa mga pulong Grieygo ug Hebreo.

Sa Griyego gitawag kini og pneumah ug sa Hebreo Ruah nga dunay emphasis sa gininhawa sanglit ang Espiritu man ang sukaranan nga makaingon kita buhi ang tawo gumikan sa kamatuoran nga siya nagginhawa.  Ang tawo nga walay ginhawa patay man.

Ang paghatag sa gasa sa Espiritu Santo ngadto sa mga magtutuo sa panahon sa pentekostes mao man ang adlaw kanus-a nahimugso ang simbahan ug sukad niadto hangtud karon nagpabilin man siyang buhi.

Kasinatian

Ang pulong Charismatic gikan man sa pulong karisma nga nagpasabot og mga gasa ang magtutuo nga naksulti sa mga nagkadaiyang mga pinulongan timaan man nga ang Espiritu Santo nagdala og kahiusahan sa daghanang mga tawo nga nakasaksi niadtong panahona.

Kini tungod kay ang Dios dili  man Dios kalibog kondili Dios man sa kahan-ay ug pagsinabtanay. Apan wala kini magpasabot nga kinahanglang atong bansayon ni pugson nga kita makasulti gyud sa mga pinulongan nga dili hisabtan kay sa unang bahin dili man sila glossolalia hinunoa xynoglossy lamang nga sa laktod walay kahulogan.

Mas haom nga atong sangpiton ang lamdag sa Espiritu Santo aron diha sa atong panaw nga Kristohanon kita magpabiling mainiton diha sa paglibkas sa mga pulong sa pagdayeg ngadto sa Dios.

Lihok

Karong Semanaha pamalandongi ang lihok sa Espiritu Santo sa imong kinabuhi ug sa unsang paagi natandog ug nadasig niya ang imong pagtuo ngadto sa Nabanhaw’ng Kristo.

Pangamuyo

Tanan: Umanhi ka O Espiritu Santo pun-a sa kalayo sa imong gugma.

Ang mga kasingkasing sa imong mga alagad ipadala ang imong Espiritu ug mamugna sila ug bag-ohon mo, ang dagway sa yuta!