Hangtod karon way opisyal sa Land Transportation Office (LTO) nga nakiha ni nasilotan sa kalangay sa pagpanghatag sa dul-an sa milyon ka plaka sa mga sakyanan. Wa say resulta nga gipagawas sa imbestigasyon nga gisaad ni LTO Chief Vigor Mendoza sa iyang pagduaw sa Sugbo niadtong Agosto 2023.
May mga plaka nga unom ka tuig nang natanggong sa bodega sa LTO sa Talisay City sa habagatang Sugbo. Misteryuso ang pagkatanggong sa 670,000 ka plaka samtang gisiyam-siyaman og pinaabot ang mga tag-iya og sakyanan nga 2018 pang nakabayad sa rehistrasyon.
* * *
Sa pagbalik ni Mendoza sa Sugbo niadtong Marso, wa siya maghisgot sa imbestigasyon. Gikalimtan nang iyang pasidaan nga silotan ang mga opisyal sa LTO nga mapamatud-an nga nagpabaya sa pagpanghatag sa mga plaka.
Nabawo ang mga naglaom nga ang bag-ong liderato sa LTO makatul-id sa binuang sa ilang gipulihan. Kay may mga pasangil nga ang natanggong nga mga plaka sa Sugbo, nga maoy kinadaghanan sa tibuok nasud, di tungod sa katapolan. Kon dili tinuyo sa pipila ka opisyal sa LTO nga nisuway unta sa pagpanguwarta ginamit ang mga plaka.
* * *
Kasaligan namong tinubdan nagbutyag nga nitanyag ang pipila ka opisyal sa LTO ngadto sa dealers sa mga sakyanan sa Sugbo ug Central Visayas nga mas paspas nga ma-release ang license plates kon mobayad sila og P100 kada plaka. Nagpanilap na silang daan sa minilyon ka pesos nga mabolsa.
Pero wa modugo ang dealers. Kay maglisod sila pagpasabot sa mga motorista, nga maoy pasahan sa bayranan, nganong kinahanglang modugang og bayad sa mga plaka nga dugay na nilang nabayran.
* * *
Kay wa man kakuwarta, gipasagdan ang mga plaka nga natanggong sa bodega sa Talisay. Nagpalusot na lang nga 20 ka plaka ra ang na-release kada adlaw kay kuwang sila og mga trabahante, hinay ang internet connection ug usa ray ilang scanner.
Ambot nganong nawad-an og interes si Mendoza sa pagtinuod sa imbestigasyon. Tingali tungod kay wa na sa puwesto ang kasagaran sa mga responsable sa nabulilyaso nga panguwarta. Hinaot nga di tungod kay nagpasiugda sab ang bag-ong liderato og ilang kaugalingong raket pagpahimus sa busluton nga sistema sa pag-apud-apod sa license plates sa mga sakyanan.
* * *
leolastimosa@gmail.com