Giklaro na sa Office of the Government Corporate Counsel (OGCC) ang unang legal opinion niini nga inay makahusay sa kagubot sa Metro Cebu Water District (MCWD) nakasamot hinuon sa kaguliyang ug kalibog tungod sa managlahing interpretasyon.
Ug sigun sa bag-ong opinyon sa OGCC, sayop ang gihimo sa Local Water Utilities Administration (LWUA) nga partial take over sa operasyon sa Metro Cebu Water District.
Gisuportahan sa OGCC ang baruganan nilang MCWD board chairman Joey Daluz III nga di balido ang pagpanghilabot sa LWUA sa ilang operasyon tungod kay wa silay basihanan.
Samtang tinuod nga apil sa gahom sa LWUA ang pagtake over sa operasyon sa mga local water district apan dunay kundisyon sa dili pa kini mahimo nilang buhaton.
Ug sigun sa OGCC kinahanglang mamatud-an una nga in default ang water district sa pagbayad sa utang niini.
Sa kaso sa MCWD wa silay utang nga wala mabayri. Busa klaro unta nga di gyud maisip nga in default ang MCWD.
Apan nangugat sila LWUA administrator Moises Salonga ug Chairman Ronie Ong pagpangilog sa pagdumala sa water district.
Ilang giinsister nga dili limitado sa utang nga wa mabayri aron maisip nga in default ang usa ka water district.
Sigun nilang Salonga ug Ong nga ang kapakyas kuno sa MCWD pagpakunhod sa ilang non-revenue water o ang usik nga tubig maisip na nga "in default" ang MCWD management busa angayan na silang mo take over.
Ambot unsay motibo sa LWUA sa pagpamugos bisan klaro ug tataw baya unta ang kundisyon sa balaud.
Kun si Daluz maoy pangutan-on dunay personal nga interest si Ong. Kun unsa si Daluz ray nahibawo.
Posible sab nga nagpagamit lang ang LWUA sa politika. O ba kaha nisakay sila sa kahigayonan tungod sa di maayong relasyon nilang Daluz ug ni Mayor Michael Rama nga karon ubos sa unon ka buwan nga preventive suspension.
Kun unsa may ilang motibo usa ka butang ang klaro na sa pagkakaron---nasupalpal ang LWUA.