EDITORYAL - Motor taxis angay pun-an

Nagkadaghan na ang mga sumasakay, duna nay mga modernong pasaheroan, apan ang mga tawo pirmeng gadali padung sa ilang mga destinasyon, kun mosakay og taksi mahal ang pleti ug masangit pa gyud sa traffic.

Karon naa nay mga motorcycle taxis nga gitawag og app-hailing rides sama sa Angkas, Move It, ug Joy Ride. Mao kini ang tulo ka mga dagkong kompanya nga legal nga namasahero sa kadalanan karon sa Pilipinas.

Apan kini sila dili pa hingpit matawag nga opisyal nga alternatibong matang sa transportasyon sa publiko. Ubos pa gihapon sila sa pilot experiment sa Department of Transportation isip alternatibong public transport.

Sa una, habal-habal lang apan gikonsiderar kini nga ilegal. Sa pagkatinuod, dako kini og natabang sa mga tawo kaniadto sa wala pa mauso kining mga pasaheroang motor. Sila maoy tigsalo sa mga pasaherong dili kayang dad-on sa mga tradisyonal nga pasaheroan sa mga gagmay ug mga hilit nga lugar.

Apan kadugayan, kaning habal-habal nahimo mang kakumpetinsiya na sa mga pasaheroan diha sa patag. Bisan bawal, lisud silang pitulon kay wala man say ilhanan kun namasahero sila kun usa ra ilang sakay.

Karon duna nay app-hailing rides, kumusta naman ang eksperimento? Apan kun ang mga sumasakay gyud maoy pangutan-on, mas daghan ang nakauyon ani. Kay makalikay sa traffic ug mas dali maabot sa ilang mga destinasyon.

Sakto ra sab nga dunay regulasyon sa pletihan kay gibase gyud sa distansya sa destinasyon sama og taksi, mas barato lang hinuon.

Kinahanglan lang gyud nga dili patuyang og rekrut ang mga kompanya aning motorcycle taxis og mga drayber kun kwestyonable ang personalidad o pagkatawo.

Apan labing maayo nga dili limitahan ani rang tulo ka kompanya ang maka-operate og motor taxis. Kinahanglang tugotan pa ang uban nga gustong mo-apply. Kay aning paagiha, mas daghan og kapilian ang mga tawo unya kun dunay daghang kompetisyon mas mobarato ang pletihan ug makaayo kini sa riding public.