Samtang namahaw, gipakita ko sa akong anak-babaye sa preskong video footage nga gi-post sa Facebook pasado alas 6:00 sa buntag, Mayo 10, 2024, bahin sa dakong disgrasiyang nahitabo: mixer truck mihasmag sa nanaghunong mga motorsiklo ug mga four-wheel nga sakyanan samtang nagpaabot kanus-a mosiga ang Go traffic-signal light diha sa nagkuros nga dalan sa may Sergio Osmeña/General Maxilom Avenue duol sa Robinson Galeria ug sa kanhi nasunog nga White Gold building.
Ang distansiya sa duroha ka nagsunod nga motorsiklong naghunong, lagyo baya. Nga sa ato pa, sila mga safety conscious driver. Apan anugon lang ang ilang pagkamasunoron sa balaod. Kay gidumbol gihapon sa mga SUV ug awto human sungaya ug daroha sa maong mixer truck nga miangin pag laing SUV diha sa pikas kilid niini, diin side mirror morag kalamunggay giharos, ayha pa hingpit mihunong ang mixer truck.
Mianig lainlaing reaksiyon kining maong hitabo. May misabot man tuod sa mixer truck driver nga basig nakatagpilaw lang kini, pero mas daghan ang mipasiunag pabuto sa ilang komentariyo, kinsa miingon nga dako kaayo silang supak kon ang ikatarongan unya sa drayber ngadto sa moresponding mga otoridad mao nga nawad-ag brake ang sakyanan, diin mao dayoy madalidaling ipasangil halos sa tanang nakasalang tsuper.
Bitaw, nganong mamakak pa man? Kana kon matinuod ilang pangagpas, ha? Nganong pun-an pa man ang sala og lain? Makalibre ba sa dakong obligasiyon ang pagpasangil sa gubang brake nga maoy hinungdan sa disgrasiya? Dili ba, makapahilayo lamang nato kinig samot sa Ginoo?
Higala, timan-i. Ang mga tawong nagtinarong-misunod sa balaod sa trapiko, mapagan pa man gani sa gilikayan nilang disgrasiya? Unsa na kaha, ikaw, kinsa bisan nasayod nga giduka na, o may depekto na ang brake, mipadayon ra gihapon sa pagmaneho? Dili ba, luoy kaayo, nga bisan sila naghunong na, imo gihapong gidasmagan?
Nganong midrayeb ka pa man nga dili man diay road worthy ang kahimtang sa imong sakyanan ug kondisyon sa imong panglawas? Dili ba, gidili man kini?
Mao baya kini sagad hinungdan sa mga dinagko-dugoong disgrasiya. Unta, hingtungdang drayber, likayan mo na kini. Buwahan, wala nay inosenteng nagtinarong mabiktima sa imong kadanghag. Nga mahimong maoy makarebokar sa imong lisensiya, forever!
sa uban