Wala makaagwanta

Gibati ko ang tumang kaguol sa dihang usa sa mga naduaw nakong masakiton ang namatay. Matud pa sa tagtungod wala na gyud siya makaagwanta. Mokurog man gud kini ug daw magsalimuang.

Ako mismo nakasaksi sa maong hitabo. Apan ako silang giingnan nga kun mahimo ipadala gyud sa doctor kay tataw kaayo nga dunay problemang neurological ang maong batan-on nga tingali maisip pud natong viral in origin.

Wala lang gyud maklaro ang findings sanglit kulang man sa laboratory exams.

Tingali gumikan sa suliran sa panudlanan mao nga wala na lang gyud mohimo sa maong lakang ang mga tagtungod.

Ang healing and deliverance wala man magpasabot nga kinahanglan gyud nga mamaayo ang pasyente. Dunay mga sakit nga sikolohikal ug pisikal busa gikinahanglan nila ang mga eksperto labina sa natad sa sikolohiya ug medisina.

Pun-an pa sa kainit sa panahon karon ug mga pressures external man o internal nga nakapadugang sa gihambing mga kabalaka. Mao nga gumikan ning maong mga suliran ang tawo usahay wala nay gana nga magpakabuhi.

Kitang tanan mahimong mahisama sa maong batan-on nga napukan gumikan sa kaluya ug kawalay access sa mga kahimanan ug kahigayonan sa hinabang sibo sa maong panginahanglan.

Mentras tanto ang atong mahimo mao lamang ang pagdasigay ug paglig-onay sa matag usa kanato.