Flores de Mayo na usab. Ang kanihit sa mga gidalang bulak sa mga nanimbahay nga nakita ko sa miaging Lunes, Mayo 6, 2024, 5:30 p.m. novena mass, igo nang makatug-an nga epekto na kini sa El Niño phenomenon.
Mga kamaisan ug kahumayan sa atong mga igsuong mag-uuma, apektado usab ning dakong hulaw nga miabot sa atong kinabuhi. Gani, may kakahoyan o kabukirang nasunog gumikan ning maong gumonhap.
Ug kun nakasinati man og hulaw ang atong naupawng kabukiran ug nangliking kasapaan, mas grabe ang matang sa hulaw nga atong natagamtaman, mga kaigsuonan kong kabos, niining pagpamunoan sa administrasiyong Bongbong Marcos, diin kun unsa man katam-is ang mga pulong nga manggawas sa iyang baba, ingon niini usab kapait ang aktuwal niyang gibuhat sa katawhan, kinsa maayong pagkailad sa iyang pagkabakakon.
Kadto lang iyang giingon sa sinugdanan, nga mas nindot nga atong nasod magmahigalaon sa Tsina, unya atik ra diay kay didto man hinuon siya makigsuod sa Amerika, tan-awa unsay nahitabo sa atong mga Philippine Coast Guard nga barko? Pirme lang bombaha’g tubig sa nagpasingit nga barko sa mga Insek.
Ang pagpa-drug test nga dapat seryosohon niya sa pagtuman, igo ra niyang gikatawakatawaan. Ang pagtangtang sa mga maayong mangangalagad sama nila ni kanhi Executive Secretary Vic Rodriguez, Press Secretary Trixie Cruz-Angeles ug uban pa, unya gipulihan niyag mga dilawan.
Ang pag-ali sa mga Maisug Peaceful Prayer Rally gamit ang iyang gahom sa pagpanghadlok-silot kutob sa mga LGUs nga magmagahi, pudyot lamang kini sa salawayong binuhatan niining administrasiyong hagbay rang gisuka sa mga OFWs ug sa kinabag-ang hut-ong sa mga nagpakabana.
“Gutom na ang katawhan!” Mao kini rasong gipalanog ni Tatay Digong niadtong ilang Mayo 7, 2024 Dumaguete Maisug Peaceful Prayer Rally.
Tungod sa dakong hulaw nga pirmeng gidalit sa namunoan karon ngadto sa minilyong timawa, misamot ilang kagutom. Hinungdan, nga gusto nilang ipahungaw ilang kahiubos ug kadismaya pinaagi sa malinawong mga rally, unya pugngan pa ninyo, Mr. President ug First Lady Liza?
Kamo baya ang nagdalag hulaw sa katawhan. Busa, kamo ra usab ang makahatag og tukmang sulbad. Unta, maaksiyonan dayon samtang wala pa madagkoti ang nagakadaghang gaay na kaayong mga dahon. Kay simbako maduslitan, sila dili na mapugngan.