Sa pagsugod pa lang niyag lingkod sa Malakanyang, natilawan dayon sa katawhan ang kaparat sa templada ning pagpamunoan ni Presidente Bongbong Marcos Jr. (PBBM), kinsa gidudahan nga hagbay rang nagumon sa gidiling drugas.
Human niya tangtanga sa puwesto si kanhi Executive Secretary Atty. Vic Rodriguez, kinsa lunod-patayng miprotehir niya batok sa mga kaaway sa politika sa wala pa ang 2022 election hangtod midaog siya sa pagka-pangulo, diin bisan pa sa pagpakahilom ni Atty. Vic, gipakaulawan-pasakitan gihapon ang buotang abogado ug iyang pamilya sa bagsik nga First Lady Liza, kalit lang nabungkas ang seradong baba ni Atty. Vic ug napugos pagtug-an sa gitipigan niyang hinungdan nganong gisibak siya sa pagka-executive secretary.
Sa usa ka interbiyu, matUd niya, wala pa gani sila maka-take oath sa ilang pagkapinili, gihatagan na siyag listahan ni Liza sa mga ngalan sa tawong maoy gustong ipamutang niini sa mga dagkong puwesto, kinsa kasagaran, nailhan ni Atty. Vic nga mga tawong korap, smuggler o notado nang mga hiwing mangangalagad. Hinungdan, wala mosugot si Atty. Vic.
Kinahanglang magmatngon siya diha sa iyang pagpili-pagrekomendar. Butang, nga wala ikahimuot ni Liza, kinsa maoy nangitag paagi nga mapapha-maitsapuwera si Atty. Vic. Resulta? Aw, tan-awa, kinsay gipang-appoint ni PBBM-Liza sa mga ahensiyang naa ang daghang kuwarta?
Wala kini ikalipay sa nagpakabanang katilingban. Gani, ang iladong artista, Ms. Vivian Velez, ubos sa programang Truth That Matters sa YouTube, namahayag nga sila miumol og ‘Marcos Resign Movement’ group, diin siya midasig sa katawhan nga mouban sa ilang kawsa. Sanglit, ultimong mga peaceful rally nga nagsunod sa hustong proseso, gi-Martial law man sa walay puangod nga administrasiyong Marcos.
Matud niya, ang nahisgotang Marcos Resign Movement gilangkoban sa nagkalainlaing dagkong organisasiyon, diin matag usa may gidaghanong 4M-5M members.
Pastilan, kun sila adunay ingon niini ka daghan, pun-an sa Kingdom og Jesus Christ ni founder Pastor Apollo C. Quiboloy nga may 5M-7M, unya apilan pa sa Iglesia Ni Cristo, Romano Katoliko ug tanan magkauyon nga pag-abot sa tukmang gipaabot, magpanon paingon sa palasyo nga magpaninggit: “Marcos resign!”, dili kaha matinuod ang gisulti-bahad ni Tatay Digong, nga basin ang nahitabo sa amahan, mahitabo usab sa anak?
Unta, walay dugong mobanaw sa yuta!