Dihang nangayo ko sa Department of Public Works and Highways (DPWH) og dugang kasayuran sa ilang pagpatag sa kabukiran sa Balamban para sa bag-ong Capitol building, ila kong gipasa ngadto sa kontraktor sa proyekto: Ang JJ&J Construction and General Supply.
Gi-text nako ang numero sa kontraktor ug nananghid mahimo bang manawag. Way tubag. Maong pasayloa nga wa pa koy reaksiyon nga nakuha parte sa cease and desist order (CDO) nga giluwatan sa Environmental Management Bureau (EMB) batok sa proyekto tungod sa kapakyas sa kontraktor pagkuha og environmental compliance certificate (ECC).
* * *
Nangayo ko’g kopya sa CDO gikan sa EMB. Gipa-email ko’g pormal nga hangyo sa regional director. Napanid-an sa among viewers nga taga Balamban nga nahunong nang trabaho. Hinaot nga way sukaranan ang kabalaka nga, sama sa pribadong resort sa Chocolate Hills sa Bohol, giisnab rang CDO.
Laing viewer ni-text og link sa YouTube video nga ang pagpatag sa bukid sa Cambuhawe gisugdan sa Pebrero sa niaging tuig. Sa ato pa, naabtan ang kontraktor og usa ka tuig ug usa ka buwan human nisugod pagtrabaho una nikuha og ECC.
* * *
Dugang kasayuran nakuha ni Manila Times Columnist Marit Stinus-Cabugon gikan sa website sa DPWH. Tulo ka proyekto sa Balamban nga pulos nadaog sa JJ&J Construction:
• Cebu Provincial Government Center building nga balor og P193 milyones niadtong 2022;
• Mga dan ug taytayan nga magsumpay sa Transcentral Highway paingon sa bag-ong Kapitolyo sa Barangay Pondol nga balor og P79.2 milyones sa 2023; ug
• Phase 2 sa Cebu Provincial Government Center building nga balor og P98.7 milyones sa 2025.
* * *
Gipahinumdoman sab ni Marit ang publiko nga di ni maoy unang konttrobersiyal nga proyekto sa JJ&J. Naapil sila sa kasong plunder nga gipasaka sa National Bureau of Investigation (NBI) niadtong 2022 tungod sa P239 milyones nga garbage collection contract sa administrasyon ni anhing Cebu City Mayor Edgar Labella.
Usa sa mga sukaranan sa imbestigasyon sa NBI mao ang report sa Commission on Audit (COA) sa 2021 nga disqualified sa subasta sa kontrata pagkolekta sa basura ang joint venture sa JJ&J ug Docast Construction Co. kay, nakatag-an ka, pulos sila construction company.
* * *