Kadtong 14-anyos nga dalagita nga giingong gipusil sa wa mailhing tawo samtang nagtubag sa leksyon sulod sa ilang balay sa Cansojong, Talisay kaniadtong Abril 26, naigo diay sa bala gikan sa armas sa iyang maguwang.
Ang kadagkoan mismo sa Camp Crame pinaagi ni Koronel Jean Fajardo maoy nagbutyag niini basi sa resulta sa imbestigasyon sa kapolisan sa Talisay.
Dili diay tinuod nga laing tawo ang mipusil sa dalagita. Ang amahan sa dalagita, ang iyang maguwang nga maoy tag-iya sa armas, ug ang girlfriend niini, gipasakaan og kasong kriminal.
Mangutana mo og ngano? Gustong taguon sa amahan ang tinuod nga nahitabo sa iyang anak, kay malooy tingali siya sa usa niya ka anak nga mapriso.
Gani, matud pa ni Koronel Fajardo nga gituyo pa sa pagguba ang pultahan sa balay, aron ipatoo nga dunay tawo nga mipugos pagsulod ug gipusil ang biktima.
Kalooy tawon sa dalagita nga nabiktima ra ug ang iyang maguwang maoy nakapatay kaniya. Nahibaw-an sa kapolisan nga ang revolver sa maguwang nahulog gikan sa iyang bulsa, ug mibuto, dayon ang bala didto miigo sa dalagita.
Abi ninyo, kining revolver nga dili original, mobuto ni kon mahulog nga mag-una ang firing pin, kay modukdok man kini sa primer sa bala. Lahi kon original nga revolver kay duna man kini mekanismo nga mohapak ra ang firing pin kon kabliton ang gatilyo.
Mao nga kadtong gustong moangkon og armas, suhetoha gyud ninyo ang inyong mga pusil aron dili kamo madisgrasya, o makamugna og disgrasya.
Kon nahibawo ka sa tukmang paagi paggamit og armas, gamay ra ang risgo nga makadisgrasya ka. Mao nga gusto gyud nako nga kon ganahan ka og pusil, agi usa og gun handling seminar.
* * *
Salamat kaayo sa The Freeman nga miabag kanako aron moundang na ang Tokagawa Global Corporation sa pagpangolekta og parking fees dinhi sa Cebu City sa adlaw’ng Domingo.
Mura’g sa tanang media outlet dinhi sa siyudad, ang Freeman ra pinaagi ni News Editor Fred Languido ang miabag nako aron maundang ang pagpangolekta nga wa na itugot sa ordinansa.
Karon kunong Martes atol sa miting namo sa Cebu City Traffic Management Board, motambong ang mga tagdumala sa Tokagawa Global Corporation.
Ang tinuod, nasayod man gyud sila kon unsay dili maayong himoon, apan nagpakaaron-ingnon lang. Sama sa pagpangolekta og parking fees sa mga dapit nga wa itugot kanila, husto diay na?
Sama sa pagpangolekta og parking fees sa Domingo nga makabasa man gyud sila nga Lunes hangtud sa Sabado ra ang gitugot, unya gikan sa alas siete sa buntag hangtud sa alas siete sa gabii.
Bi, nganong mangolekta man gyud mo lapas niini?