Viva San Jose!
Sa pagtagik nako ning maong lindog vesperas sa among tinuig nga pangilin pasidungog kang San Jose Mamumuo. Kun wala ko masayop ika 62 nga tuig sa kasaulogan.
Daghan ang mga kalihukang sibiko apan mas gipatigbabaw sa Parokya ang pagsaulog niini pinaagi sa pag-ampo ug pag novena.
Dunay pipila ka mga punto sa pamalandong kalabot niini.
Una, Si San Jose hilom. Walay bisan usa ka pulong nga natagik sa balaang kasulatan nga gilitok gikan sa baba ni San Jose.
Gihulagway lamang siya nga tawong matarong. Apan wala kini magpasabot nga ang iyang kahilom kahuyangan. Hilom siya apan gamhanan.
Ikaduha, Gibalaan ang lihok sa tawo. Si San Jose panday. Iyang gibuhi ang iyang pamilya pinaagi sa iyang pagpatulo sa singot.
Seguro nasunod usab ni Jesus ang pagkapanday ni San Jose. Ang maong panginabuhi maoy namat-an og buot sa atong Ginoo.
Ikatulo, Si San Jose masinugtanon sa Dios. Bisan pa man kun sayud siya nga ang gisabak sa iyang pangasaw-onon dili iyaha ug nga sa dihang nasayran niya pinaagi sa damgo nga kabubut-on kini sa Dios, iyang gihiklin ang iyang personal nga kabubut-on ug tumong tungod kay iyang gipalabi ang kabubut-on sa Dios kaysa iyang kaugalingong kabubut-on. Ingon ana siya kamatinumanon.
Ikaupat si San Jose ingon nga patron sa maayong kamatayon ang nagpahinumdom kanato nga dinhi sa kalibutan walay laing mas labaw pa kondili ang kabubut-on sa Dios. Happy Fiesta hurot!
- Latest
