EDITORYAL - Basta gamhanan lisud dakpon?
![EDITORYAL - Basta gamhanan lisud dakpon?](https://media.philstar.com/photos/2024/04/24/1_2024-04-24_23-59-13.jpg)
Dunay mga panahon nga dalaygon kaayo ang mga tinugyanan sa balaod sa ilang paghimo sa trabaho, apan duna say mga panahon nga maayo kaayo silang batuhon og daghang pagsaway sa publiko tungod sa ilang doble-kara nga kinaiya. Daghang mga sanglitanan ug mga ehemplong pwedeng himuong basihan nganong angay silang daygon, apan sa samang higayon, susama sab kadaghang rason aron sila sawayon tungod sa wala nila pagtarong paghimo sa ilang trabaho.
Duha ray rason nganong sila sawayon sa katawhan, kung dili tungod kay nagawngan ug gihimo silang itoy-itoy sa mga impluwensiyadong tawo o ba kaha mga opisyales sa gobiyerno ug ang ikaduha mao ang ilang pagkalambigit sa mga ilegal nga kalihokan. Bisan asa sa duha, salawayon kaayo kini nga buhat kay sama ra og ilang giluiban ang katawhan ug ang sagrado nilang gipanumpaang tahas nga mao ang pagserbisyo ug pagprotektar sa tanan ug paghatag sa tinuoray nga hustisya ug kaangayan para sa tanan ug dili pagserbisyo ug pagprotektar sa pipila ka mga gamhanan sama sa pagbuhat og daghang rason o pangulipas aron makalusot.
Usa niini ang kaso ni Ruben Ecleo Jr. ang giingong supremo sa Philippine Benevolent Missionary Association (PBMA) nga gikonsiderar nga kulto, kinsa dugay kaayong nadakpan tungod sa iyang mga koneksyon.
Nagatubang siya og kasong murder may kalambigitan sa pagpatay sa iyang asawa nga si Alona Bacolod ug gilambigit sab siya uban pang mga linoog nga krimen nga binuhatan sa iyang mga die hard followers. Si Ecleo Jr. nadakpan ra pagusab ug gibalhog sa New Bilibid Prisons diin siya nitaliwan tungod sa atake sa sakit sa kasingkasing. Ang iyang impluwensiya dili lamang tungod sa iyang pagka supremo sa kulto kondili tungod sa iyang koneksyon sa politika. Usa siya ka kanhi kongresista ug ingon man ang iyang inahan usa ka kongresista ug ang ilang pamilya political clan sa maong probinsya,
Laing may pagkaparehas kaimpluwensiyado sab karon ang gipangita sa balaod, siya kadtong nangangkong Son of God nga si Pastor Apollo Quiboloy kinsa wanted sa mga kasong human trafficking ug money laundering didto sa America ug dinhi sa Pilipinas tungod sa pagdumili niya pagsanong sa mando sa Senado pagtambong sa hearing.
Sama kang Ecleo, si Quiboloy aduna say lig-ong kasandigan, kini mao ang patriarkang Duterte nga walay lain kondili si kanhi presidente Rodrigo Duterte sa Davao diin sab magbase ug nahimutang ang matud pa gingharian sa maong pastor. Kung ordinaryong tawo pa, paspas kaayong makit-an ug mabalhog sa prisohan, apan kun impluwensiyado gani, daw lisod ibton sa ilang lingkuranan ang mga tinugyanan sa balaod aron pagdakop kanila. Dili mopakita og kakugi.
Siguro labing maayong buhaton mao ang paghatag sa presidente sa nasud og ultimatum sa kapolisan ug sa tanang law enforcement units nga gitahasan pagdakop aning mga impluwensiyadong mga wanted sa balaod. Nga kun di nila madakpan, sila maoy prisuhon tungod sa paglangay-langay sa hustisya. Busa dili na angay ikahibulong ug dili magmahay kun ang publiko dili pa kumbinsido sa ilang katarong ug kuwang pa gihapon kanila og pagsalig.
- Latest