Ang Sugbo maoy usa sa mga progresibong lugar sa nasud nga adunay seryosong kakulangon sa mass transportation. Hagbay ra kining maong problema ug mora'g walay kasulbaran nga atong nakita.
Adunay kasamtangang giugmad nga Bus Rapid Transit sa dakbayan sa Sugbo. Apan daghan ang nagduha-duha kon sarang ba kini nga makasulbad sa kakulang sa mass transportation sa siyudad diin grabe na ang pagsaka sa populasyon.
Bisan pa man niini, daghan ang nag-anticipate niining maong proyekto kay lagi at least makadugang kuno sa pangpublikong transportasyon sa dakbayan. Mao nang kusog nga miarangkada ang konstruksiyon niini karon.
Apan puwerte nga nakarebenta ni Cebu City Mayor Michael Rama sa dihang dunay mga puwersa nga buot mopahunong sa BRT kay lagi nakaapekto ang maong proyekto sa pagka-heritage site sa Kapitolyo.
Si Cebu Governor Gwendolyn Garcia miluwat og memorandum nga nagpahunong sa konstruksiyon sa BRT station atbang mismo sa Capitol building kay lagi makaapekto kini sa dagway sa Kapitolyo.
Midason usab ang iyang pag-umangkon nga si Cebu City Vice Mayor Raymond Alvin Garcia kinsa mi-deliver og privilege speech sa Konseho sa dakbayan batok sa maong BRT station nga, matud niya, usa ka 'photobomber' sa Kapitolyo.
Gikasuko kini ni Rama, kinsa mibatikos sa gobernadora nga nanghilabot kuno sa affairs sa dakbayan. Iya usab nga gibirahan ang bise mayor nga iyang giingong mibukobuko kaniya tungod sa pagsupak sa maong proyekto.
Karon, nameligro ang kamada sa implementasyon sa BRT sa siyudad. Dako na og agi ang maong proyekto apan kuyaw nga mapurnada kini ug mahimong biktima sa walay hinungdan nga pamulitika.