Seryoso ang problema sa dakong kakuwangan sa supply sa tubig dinhi sa Metro Cebu.
Mas nisamot ang problema nunot sa nagpadayong huwaw nga dako na og epekto sa mga tanom didto sa mga bukirang barangay sa dakbayan sa Sugbo.
Ang chairman mismo sa Metro Cebu Water District (MCWD) nga si Atty. Joey Daluz miangkon nga anaa na sa kritikal ug alarming nga level ang pagkuwang sa supply sa tubig.
Ang kinatibuk-ang demand sa tubig sa Metro Cebu mokabat og 600,000 cubic meters matag-adlaw samtang ang production sa MCWD mokabat lang og 301,000 cubic meters. Kini panahon sa normal nga panahon nga way huwaw.
Apan tungod sa grabing kainit nga miresulta sa paghubas sa mga tinubdan, mikunhod og 50,000 cubic meters ang production sa MCWD. Sa ato pa nga 251,000 cubic meters nalang ang mahimong maapud-apod sa MCWD ngadto sa iyang mga konsumidor.
Apan tungod kay di man malikayan nga dunay mga tubo nga buslot ug kawat sa tubig, mas minus pa gyud niini ang gidaghanon sa tubig nga moabot sa mga panimalay.
Matud ni Daluz nga anaa sa 31 porsiyento ang non-revenue water (NRW) sa MCWD. Ang NRW mao ni ang supply sa tubig nga nausik tungod sa busloton nga mga tubo ug kawat.
Sa ato pa kun ato pa gyud nga kuhaan ang 251,000 cubic meters nga available nga supply og 31 porsiyento, anaa nalang gyud sa 173,190 cubic meters ang available nga supply sa pagkakaron.
Labihan ka dako sa kal-ang sa gikan sa 600,000 cubic meters nga total demand ug sa 173, 190 nga actual nga supply nga mahimong magamit sa mga konsumidor.
Unta nasabtan ni sa mga opisyal sa dakbayan nga nagtinguha pag-ilog sa pamunoan sa water district ug mihimo sa tanang mga pamaagi bisan ang pagmugna og kasamok aron magmalampuson sa ilang tinguha.
Seryoso ug labihan ka alarming sa sitwasyon nga ang gikinahanglan mao ang pagtinabangay pagpangita og pamaagi unsaon nga mapun-an ang nagnihit nga supply sa tubig inay nga mag-ilog sa gahom.
Dunay tukmang panahon sa pamolitika ug karon nga dunay krisis sa tubig dili maoy hustong panahon alang niini.
Kun ang mga opisyal sa dakbayan sa Sugbo tinuod nga naglantaw sa kaayohan sa publiko angayang hunongon nila ang pagpangilog sa gahom sa MCWD ug maoy tutokan unsaon nga mapalambo pa ang serbisyo niini pinaagi sa pag-abag sa tanang gikinahanglan alang sa pagkuha og dugang tinubdan sa tubig.