Kini ang subling gipahimangno sa mga otoridad dili lang sa mga bata kon dili apil na sa mga dagko ilabi na sa mga tigulang kay kong motubay ka pagpakig estorya sa tawo nga dili nimo kaila. Segurado gyud nga ikaw mabiktima sa mga tampalasan nga mangingilad.
Sama sa nahitabo sa usa ka senior citizen sa dakbayan sa Talisay nga nabiktima sa budol-budol gang nga nagpaila nga mga Korean national kinsa nagdrama nga nabiktima kuno sa pagpangilad.
Ang biktima nila nga tiguwang nalUoy ug gipasakay pa gani sa iyang sakyanan ngadto sa usa ka tindahan sa Talisay.
Nagpakaaron-ingnon ang mga mangingilad nga mogamit og kwarta ug mga alahas bugti sa usa ka bag nga kwarta nga naay sulod nga usa ka milyon ka pesos.
Nakatuo usab ang biktima nga mga langyaw ang iyang gitabangan kunohay kay nag-makeup man usab kini ug mora’g Koreana na tan-awon ug nag-Ininglis nga Korean style.
Ulahi na dihang nakamatngon siya nga nabiktima na diay siya sa budol budol kay pag abli sa bag nga giingong dunay usa ka milyon ka pesos pastila mga papel ra diay.
Paita, dili gyud maayo kong masobrahan kita sa atong pagkabuotan ug maluoy dayon sa mga tawo nga dili nato kaila, sa kauwahian kita ra usab ang makaluoy. Kining mga mangingilad ra ba hilabihan ka tam-is og dila nga makabuhi og patay ang ilang communication skills kay murag malumay ang mga tawo nga ilang ikaestorya.
Busa kong dunay moduol nga mangayo og tabang kay nagdrama nga dunay nahitabo kaniya, ayaw gyud dayon og tuo, inay dad-on deretso sa pulis aron dili mangayo sila og tabang, kong budol budol sila layo pa sa alas kwatro mosibat na kay mahadlok madakpan.
Bahal og ingnon ko nga batig batasan ug garboso basta dili nako personal nga kaila dili gyud ko mosalig dayon, ako gyud dayo dispatsahon aron dili na makahigayon pa sa pagpangilad. Segi naman unta kini mabalita apan daghan gihapon kaayo mabiktima.
Hinumduman kanunay nga mas maayong dili mokompiyansa, ibutang nato sa lugar ang pagpakabana sa atong isig ka tawo aron dili kita ang mabutang sa peligro. Busa ayaw pakig estorya sa mga estranghero kong makig estorya man gani i-refer dayon ngadto sa mga otoridad.