Adunay nahitabong ‘tug of war’ sa gahum diha sa Metropolitan Cebu Water District (MCWD) tali sa Local Water Utilities Administration (LWUA) ug ang MCWD Board.
Ang duha parehong nangangkon nga para sa “best interest” sa publiko ang ilang tumong. Ang MCWD mao ang pinakadakong tigsuplay og tubig sa halos tanang lugar sa Sugbu nga dunay daghang molupyo.
Ang LWUA misuspenso sa MCWD General Manager ug mga miyembro sa board of director ug pagkahuman nagbutang og kaugalingon niining acting-general manager ug interim board.
Ang MCWD Board gipangulohan sa tsirman niini nga si Atty. Joey Daluz ug general manager Edgardo Donoso samtang ang LWUA gipangulohan nilang chairman Ronnie Ong ug administrator Atty. Jose Moises Salonga ug OIC general manager DX Lapid Jr. Gawas aning mga nagbanggang mga dagkong opisyal, naa sab ang kampo sa Cebu City pinangulohan ni Mayor Michael Rama nga daan ng gustong hulipan ang liderato ni Daluz kay gustong magbutang og iyahang kasaligang mga opisyales ug miyembro sa board. Apan giatbangan sab si Rama sa kampo sa Kapitolyo pinangulohan ni Gov. Gwendolyn Garcia nga gipaluyohan sab sa mga mayor sa kalungsoran ug mga component cities nga nagsalig sa suplay sa tubig sa MCWD.
Gisupak nila ang aksyon nga gihimo sa LWUA ngadto sa MCWD ug dapig sa liderato ni Daluz.
Sa laktod, ang duha ka mga kampong nag-ilog sa gahum sa MCWD parehong dunay mga lig-on nga mga backers nga andam mopaluyo kanila.
Ang numero unong naglibog karon mao ang mga gwardiya sa MCWD kun kinsa nga mga opisyal ilang sundon kay pareho mang miisyu og mga resolusyon.
Kun ang mga nagtigi nga kampo pulos mga abogado wala magkaparehas og interpretasyon sa balaod sama aning Presidential Decree No. 198, sila pa kahang mga yanong magbalantay? Ang nakabati niini, kay karon pa gyud sila nag-ingon ana nga naay krisis sa tubig ang mga Sugbuanon tungod kay summer months karon ug naa pa gyuy El Niño. Ang makapabalaka ani kun maapektahan na hinuon ang serbisyo sa MCWD pagsuplay og tubig tungod kay sigurado gyung maglibog ang mga tawo niini kun si kinsa ang mopirma unya sa mga dokumento sa mga palaliton ug uban pang transaksyon, kay managana man sila nga di sila maamong og kakiha.