Kanunay na ko nga mobiyahe sa probinsya niining panahona, ug nakabantay gyud ko nga dunay mga kiat kaayong magmaneho og motorsiklo.
Dili isyu kon magpakusog pagpadagan basta ibutang lang sa lugar. Ang gipasabot nako nga kon mo-overtake, adto kini himoa sa unahan nga dili mababagan ang sakyanan nga imong giunhan.
Apan unsaon man nga dunay ubang driver nga hambugero lang gyud kaayo nga mopadagan, aron ingnon nga bansay kaayo sila nga mosakay’g motor.
Pagbiyahe nako paingon sa Barili kaniadtong miaging semana, usa ka tawo nga kusog kaayong nagpadagan ug mi-overtake sa laing motor, deriyot gyud magkasingki.
Ang gihimo sa naghinambog nga driver, dihang nakauna na siya og mga kapin sa dupa, mideritso siya’g liko paingon sa tuo nga agianan sa motor nga iyang giunhan.
Nagsunod ko kanila ug kon nadisgrasya pa, yam-iran nako ang maong tawo nga naghinambog. Ang nakaapan lang kay makaamong siya sa nagtinarong pagpadagan.
Didto sab sa Trans-Central Highway, nakuhaan og video ang usa ka motorista nga kusog nga nagpadagan sa iyang NMax nga motor, ug gipahandag gyud niya sa likuon nga karsada.
Nabagnos bitaw na, aw ang motor misaliring sa daplin ug nabangga pa gyud sa gipabarug nga iron railing sa wa pa mahulog ang motor ngadto sa lawom nga kanal. Kon ingon niadto nga hinambugero na pagpadagan, ug kon dunay nagmotor nga diha sa daplin nagtinarong ra tawon sa pagbiyahe, unya maigo sa nabagnos nga motor? Maangin tawon? Makamugna man gud ni og aksidente kining hinambog nga klase sa pagpadagan og motor, kay usahay tungod sa kakusog sa dagan, mokalit lang pagtunga sa imong lugar nga nagbaguros.
Mao nga unta, ang atong mga tinugyanan sa highway, ang mga sakop sa PNP Highway Patrol Group (HPG) ug ang Land Transportation Office (LTO), mohimo unta og operation batok niining maong mga abusadong driver.
* * *
Nakadawat na sab ko og reklamo gikan sa usa ka tag-iya’g sakyanan. Dili ra kay usa, daghan na.
Wa na unta ko kaayo magtagad niini, apan daghan na man ang mipadangat og reklamo, mao nga ako na usab kini nga hisgotan. Kabahin kini sa pagpangolekta og parking fees sa Tokagawa Global Corporation sa mga moparking sa karsada sa adlaw’ng Domingo.
Ang gigamit nga nga’n sa nangolekta, CEPMA, pero kasosyo ra gihapon na sa Tokagawa. Kadtong mga nagreklamo nga kolektahan sila og parking fee sa Domingo, usbon nako nga ayaw lagi mo pagbayad.
Ilegal ang pagpangolekta nila sa Domingo kay wa kana itugot sa ordinansa sa siyudad. Ayaw sab mo pagbayad og parking fees kon lapas na sa alas 7 sa gabii.
Unta inyong masabtan.