CEBU, Philippines — Napulihan og kaguol ang unta kalipay sa usa ka 28-anyos nga barbero nga taga Isla sa Camotes human gikawat ang iyahang cellphone ug kwarta nga P500 sa duha ka babaye nga nigamit aning gitawag nga modus nga ‘tumba-saging’ kagahapon sa kaadlawon, Abril 5,2024.
Saysay sa maong barbero nga kuyog niya iyahang ig-agaw nag-inom sa usa ka imnanan diha sa dalan Pelaez sa Cebu City ug pwerte gyud niyang huboga.
Padulong na unta siya mopauli giingong dunay duha ka babayeng mga mugbo og lupad nga misugat niya ug miingon nga ihatod siya sa gipuy-an niini diha sa may dalan Sanciangko.
Tungod sa matud pa iyang kahubog wala na siya kamay-ong sa mga nawong sa mga babaye apan gidala siya nila sa usa ka lodging house diha sa may dalan Manalili.
Nakamatngon matud pa siya og buot alas-3 na sa kaadlawon kagahapon hubo na siya ug wala nay sapot sa usa sa mga lawak.
Nakit-an nalang sab niini iyahang sinina ug pitaka nga naa na ilawom sa katre ug wala nay kwarta ug apil sab sa gikuha ang iyahang cellphone.
Ang tumba-saging nga modus dugay ng estilo sa mga kawatan nga sagad binuhatan sa mga mugbo ug lupad ug mga kakunsabong mga lalaki nga sagad ilahang mga kapuyo.
Ang sagad sa biktimahon kadtong mnga grabe na ka hubog nga ilang dad-on aning lodging houses ug samtang wala kini kalibotan sa nahitabo, himulbolan kini sa iyang mga butang.
Wala siya’y laing nabuhat kondili ang pagsumbong sa Waterfront Police Station aron mailhan ang maong mga babaye ug makuha og balik ang iyahang cellphone.
Dili na sab kasulti ang maong lalake nga kung naay nahitabo niya sa duha ka babaye, iyang giklaro nga wala niya sila giabangan para sa lawasnong kalipay.
“Wala gyud, tinud-anay gyud, padulong na(uli)…Pwerteng huboga nako nawagtangan ko’g buot,” sigon sa 28-anyos nga barbero. – IBM BANAT NEWS