Hawan ang Krus nga akong gipahimo sa lokal nga tiggama dinhi sa among Parokya. Hinuon, medyo bug-at kini sanglit tugas man ang materyales.
Gigamit namo kini panahon sa estasyon sa Krus. Hinuon gihimo kini sulod mismo sa compound sa Parokya. Gituyo kini aron mamahimong mas suod ang pagsaulog nii.
Diha sa among panaw, nahimong init ang silaw sa adlaw. Mga pagluhod ug himno maoy gigamit aron makigkukabildo sa Ginoo nianang gilansang sa Krus. Walay tingog sa pagsukol hinunoa kalumo ug pasaylo ang iyang gipakita taliwala sa mga kabangis ug kapintas kanila nga nilabnot sa iyang bungot, nilansang sa iyang mga kamot ug mga tiil.
Niadtong Sabado Santo gihimo namo ang pamalandong. Sa maong pamalandong tukma usab nga among gipamalandongan ang kamatuoran sa kamatayon. Ang tanang mga butang atong pagahimoon ingon nga kabahin sa mas halapad nga kamatuoran sa kamatayon. Sa atong panaw usahay nahimo kitang tugbaw.
Sa atong panaw, nahimo kitang tugbaw ug hataas ang atong paglupad. Nahikalimot kita nga mobalik ra diay kita sa abog.
Matud pang Bruce Lee be water my friend nga sa ato pa, mamahimo kitang flexible sa mga panghitabo sa palibot sa walay igong pagsakripisyo sa atong gituohan nga susama kagahapon, karon ug sa umaabot. Ug kinsa man kining dili mausab? Way laing kondili ang Dios!
Walay puas ang kagahob! Daw makabungog ang ilang tingog nga nagdahunog Ilansang siya sa Krus! Apan kining maong tinguha ug singgit napawong sa mga balita sa balita nga nagkanayon: “Nabanhaw Siya! Buhi Siya! Happy Easter kanatong tanan!