Mapahimuslanon sa puwesto

Gisalindot sa Korte Suprema ang petisyon sa usa ka Raul Macalino nga nag-kwestiyon sa pag-disallow sa CoA sa iyang sweldo isip legal officer sa Mexico, Pampanga.  Mikandidato si Macalino sa pagka-bise mayor niadtong May 2013 elections apan naparot kini.  Ginadili sa Konstitusyonang pagtudlo sa mga naparot nga kandidato sa bisan unsang puwesto sa gobiyerno sulod sa usa ka tuig gikan sa ilang pagka-pildi.  Isip Legal Officer gidahom nga nasayod unta si Macalino sa balaod.  Tataw nga tinuyo ang ilang kalapasan.  Adunay terminolohiya nga angay ihingalan sa maong matang sa tawo: “TONTO/TATUD/TALA-TALA/ABUSADO/MAPAHIMUSLANON.”  Fezteleern!

Panahon sa alisto

Mopakatap ang PNP og dili momenus 52,000 ka pulis sa tibuok nasud aron maseguro ang kahapsay sa kahimtang sa publiko atol sa semana santa.  Panahon man unta sa pagpamalandong ug paghinulsol sa mga sala ang mga adlaw sa Kwaresma.  Apan kay nasayod man ang PNP nga dili matugkad ang kinaiya ug hunahuna sa tawo mao’ng wala kini mokumpiyansa.  Adunay mga dautang elemento nga dilli motamod sa panahon bisan kwaresma kon dili mopahimulos ra gyud sa kahigayonan nga makasakiyo.  Alang kanila, ang semana santa, “dili panahon ni Kristo kon dili panahon sa alisto.”  Madahaan!

Seafoods na ang baboy

Nabatyagan ang pagsaka sa presyo sa isda ni’ng nagsingabot nga Holy Week.  Sagad sa mga Katoliko dili una mangaon og karne atol sa Semana Santa agi’g penitensya.  Makahinumdum sa pasyente nga gidid-an sa doktor pagkaon og karne tungod sa iyang hypertension.  Sa tuyo nga makalusot, iyang gi-itsa ang ilang baboy ngadto sa dagat ug gidakop kini’g balik pinaagi sa pukot (fishing net) ug dayon gipa-ihaw kini. Sa dihang gipahinumdiman siya sa pahimangno sa doktor, mitubag lang kini nga, “Dili na man karne ang akong gikaon nga baboy; nakuha gud ni sa pukot, busa ‘seafoods’ na kini.”  Pagkatoytoy! 

Matino ang pagka-hanggaw

Namahayag si kanhi senador Trillanes nga ang pagdakop ni Kongresman Teves nagpadayag sa mahitabo usab ni kanhi presidente Duterte kon moluwat na ang International Criminal Court (ICC) og orden sa pagpadakop kaniya.  Apan alang kang Salvador Panelo, kanhi legal counsel ni Duterte, nag-merida na si Trillanes kinsa wala na’y kredibilidad ug labaw nga walay naantigohan sa balaod.  Makadaghan na nga higayon nga mabutyag sa iyang mga pulong ang kakulangon sa paminsar ni Trillanes.  Haum kaniya ang panultihon nga, “Kon maghilom ang tawo, dili masayran kon hanggaw ba siya, apan kon motabi na siya matino na hinoon kini.”  Muleeeng!

Wala’y permanente’ng higala

Mipasaka si Cebu City Mayor Michael Rama og kaso’ng administratiba batok kang Cebu Governor Gwendolyn Garcia sa Office of the President pinasikad sa giingon’g usurpation of judicial ang quasi-judicial powers tungod sa pagluwat sa gobernadora og kamanduan pagpahunong sa Cebu Bus Rapid Transit (CBRT), usa ka nasudnon’g proyekto.  Wala damha sa mga Sugbuanon kining maong kalambuan.  Tinuod ang panultihon nga, “Sa politiko, walay permanente’ng higala, permanente lamang nga interes.”  Makapahinumdum kining gibuhat sa mayor sa lilas ni FPJ nga giulohan og “Mabuting Kaibigan, Masama’ng Kaaway.”  Gubat patani na! iyang credit card