Anti-Political Dynasty Law gikinahanglan ba

Giawhag karon sa grupo sa mga abogado ang Korte Suprema nga pugson ang Kongreso sa pagpalabang na sa Anti-political dynasty law. Sa 46 ka pahina nga petition giduso nila ni manlalaban Rico Domingo, Wilfredo Trinidad, Jorge Cabildo ug Ceasar Oracion sa Korte Suprema ang ilang awhag niini nga mandoan ang Senado ug ang Ubos Balay Balauranan sa pagpalabang sa balaudnon nga magdili sa political dynasty nga dugay nang gidili sa Batakang Balaud sa Pilipinas.

Section 26 sa Article II sa 1987 Philippine Constitution miingon nga ang estado mogarantiya sa patas nga access sa oportunidad sa serbisyong pang publiko ug midili sa political dynasties.

Gipaabot sa mga manlalaban ngadto sa attention sa Korte Suprema ang ilang gitawag nga nagbuntaog nga kapakyas ug pagpabaya sa kongreso sa ilang trabaho.

Atimanon kaha sa Korte Suprema ang giduso nga petition sa mga manlalaban? Dili kaha ideklarar sa Hukmanan ang petition nga usa ka Political Question busa dili sila moatimanan niini?

Ang political question ubos sa Batakang Balaud mao kadtong ang makahukom ang katawhan lamang o sa ilang kaboboton gitugyan ngadto sa mga magbabalaud o sa Ehikutibo ang paghukom.

Kun ugaling ikonsiderar sa Korte Suprema nga usa ka political question ang giduso nga petition sa mga manlalaban busa dili sila manghilabot niini, kinsa man unya ang mopursige sa mga magbabalaud sa pagpalabang sa balaud nga magdili sa dynastiya dinhi sa Pilipinas?

Sa pagkatinuod, wala na kinahanglana ang balaud nga magdili sa dynastiya sa politika dinhi sa nasud tungod kay anaa sa katawhan ang paghukom niini. Anaa sa katawhan ang paghukom magtukod ba sila og political dynasty o dili, kana tungod kay sila ang mopili sa mga kandidato sa panahon sa eleksiyon.

Walay mahimo ang mga kandidato nga pariha og apelyido kun dili sila pilion sa mga tawo. Mao nga sa isyu sa political dynasty ang makahukom kun magdumili sa paghimo sa ilang trabaho ang mga magbabalaud.