Usa ka maayong proyekto ang 56.9 km highway nga pagatawgong Metro Cebu Expressway kun kini mahinayon.
Hinuon kinahanglang tun-an kini pag-ayo sa Department of Public Works and Highways ug ubang hingtungdang ahensiya kun wala ba kini negatibong epekto sa kinaiyahan ug sa mga lugar nga maagian niini. Usa sa mga kabalakang gibutyag ni Gob. Gwendolyn Garcia mao ang peligro sa landslides tungod kay sa kabukiran man kini tukoran unya duna gyuy mga bukid nga kubkubon.
Apan angkunon man o dili, maayo kini para sa Sugbuanon karon ug sa mga mosunod nga henerasyon, basta tarungon ug klaruhon lang ang pagkatrabaho.
Kini tungod kay epektibo kining solusyon aron mamenusan ang problema sa traffic sa Metro Cebu ug sa mga kalungsoran tungod sa nagkadaghang mga sakyanan.
Ang maong expressway magsumpay sa mga kalungsoran gikan sa City of Naga sa habagatan ug sa Danao City sa amihanang bahin sa probinsya.
Aning paagiha, mamenus-menusan na ang kahasol sa mga tawo sa biyahe tungod sa traffic ilabi na pag-abot sentro sa Metro Cebu nga mao ang Cebu City nga diin nagkurus-kurus ang mga karsada ug daghan ang mga sakyanang nagdagan.
Gawas sa tawo, mas mapadali nasab niini ang transportasyon sa mga produkto ug serbisyo nga makapalambo og dali sa ekonomiya sa probinsya ug sa tanang kalungsoran ug mga siyudad nga maagian niini.
Makatabang sab kini og dako sa turismo nga usa sa mga tinubdan sa kita sa mga Sugbuanon.
Tungod kay pinaagi sab niini, daghan pa unyang mga nindot nga lugar sa kabukiran sa Sugbu nga madiskubrehan para sa turismo ug makapuno kini sa abot sa mga LGUs.
Molambo sab og apil ang tanang mga lugar sa kabukiran sama sa nahitabo sa ubang mga lugar. Kun dunay maayong karsada, paspas ang kalamboan sa lugar.