Lagda sa pagbinastos
Ang opisyal nga pamahayag sa management sa Brigada News FM Visayas nagpakita nga, sukwahi sa reaksiyon sa ilang mga magsisibya, sensitibo sila sa opinyon sa publiko nga nikondenar sa iresponsable nila nga pag-awhag sa 4 anyos nga bata pagbalikbalik sa labing law-ay nga mga detalye sa sa pagpanlugos nga iyang nahiagoman.
Ang pagtangtang sa video sa interview sa ilang Facebook page nagmatuod nga nakasabot ang management nga ang interview, sukwahi sa nahauna nilang pag-insistir, wa makatabang sa bata ug sa iyang pamilya kon dili nakadugang sa pagpakauwaw ug pagpanamastamas nila.
* * *
Lisod hinuong sabton nganong naabtan ang management og upat ka adlaw una nakamatngon sa ilang atraso. Mas lisod tugkaron nganong gipasagdan sa management ang ilang estasyon sa Sugbo, kansang station manager nga si Atty. Juril Patiño maoy nangunay pagpakauwaw sa bata, sa pag-promote sa interview sa ilang social media accounts.
Gi-pin ang interview sa ilang pages aron nga di masapawan sa mas bag-o nilang posts, mas sayon nga makit-an sa publiko nga nanguryuso sa kontrobersiya, makadani pa gyod og mas daghang views ug makapasamot og sulbong sa ilang monetization.
* * *
Sa ilang opisyal nga pamahayag, naghisgot si Visayas Area Manager Raul del Prado nga duna silay protocols sa pagpanalipod sa mga bata nga matinud-anon nilang gisunod. Pero napakyas siya pag-detalye unsa ang ilang mga lagda.
Mahimo bang ipakita ang mga lagda ug pamatud-an nga gitudlo sa ilang mga magsisibya? Kay kon basehan ang kahugaw sa ilang mga programa sa wa pa ang live interview sa bata niadtong Marso 13, lisod tuohan nga duna silay lagda sa responsable nga pagpanibya.
* * *
Naghisgot si del Prado sa “immediate internal action to implement administrative sanctions” nga way detalye.
• Kabahin ba sa “immediate internal action” ang pagpakahilom sa management sa upat ka adlaw?
• Kabahin ba sa “administrative sanctions” ang pagtugot sa mga magsisibya sa paghilak-hilak uban ang background music aron pagpalaban sa ilang mga suki?
• Sa pag-ingon nga “Both Atty. Juril and Dennes Tabar have expressed profound regret for any inadvertent harm caused and have publicly expressed their sincere remorse,” gipasabot bang del Prado ang pagpamugos nilang Patiño ug Tabar nga wa silay nalapas nga mga lagda
* * *
- Latest
