Pagpamalandong sa Malangkubong kaayohan
Bisperas sa among district meeting din ang among Parokya maoy host, amo kining gipangandaman kuyog sa akong mga sakop apil na niini si Jose Luardo.
Kini si Jose maoy guardia namo dinhi bisan walay armas.
Siya ang kanunay motimpla Kanako og kape. Sensitibo siya sa panginahanglan sa uban. Kuyog namo siya kun duna kami mga lakaw sa siyudad, pangumpra ug uban pa.
Matag Sabado siya motabang aron pag-andam sa mga pagkaon alang sa feeding. Pagkaudto, samtang nag-meeting ming mga pari, mao na lay akong nasayran nga giatake si Jose.
Sa akong pag-adto sa Malabuyoc Hospital akong nasayran nga wala na gyud si Jose. Gibati ko ang tumang kaguol.
Si Jose maayo nga higala. Gani, siya ang madali dali nako kun ugaling wala koy kasakyan. Ang mahinungdanon sa tanan anaa siya nga maminaw ug makigkukabildo.
Mubo ra gyud ang kinabuhi. Sa kamubo niini usahay dili nato mahibaw-an sa dagan niini. Mahimong kuyog ta karon apan ugma dili na gyud.
Sa laktod, kasaligan si Jose ug may dedikasyon sa iyang trabaho. Subo palandungon apan panghitabo nga angayang dawaton.
Salamat sa kahigayonan nga nagkakuyog ug ang imong kaayo dili gyud hikalimtan. Ang imong pagkamapailubon ug pagkamapaubsanon mga pagtulon-an.
Hangtud sa sunod natong panagkita. Pahulay nga dayon ihatag kang Jose Ginoo ug ang imong Kahayag nga way pagkapalong modan-ag kaniya.