Kun wala nay tanlag ang matag tawo

Daw dulom ug makaluya ang mga panghitabo sa atong kapupud-an ingon man sa tibuok kalibutan. Daw ning mga panahona nipatigbabaw ang pangilad, pagpalagot ug uban pa.

Bisan gani ang anaa sa gahom karon dili naman kasaligan.

Lisud na kaayo ipatunhay ang kaangayan sanglit ang mga tawo karong mga panahona kanunay naggukod  aron magpakabuhi mao nga moluom ug motulon sa baruganan aron lamang mo-survive.

Kusog ang lihok sa malimobongong yawa. Dili lang indibidwal ang giilad kondili lakip na usab ang mga gambalay ug Sistema ning atong katilingban.

Sa dayag nga paagi atong nasaksihan ang garapal nga pagpanalipod sa atong mga lideres sa usa ka tawo nga nangangkon nga duna siyay gahom nga langitnon. Kining maong pagpangangkon nakapadato niya ug kining mga tawhana nga nag-alirong kaniya.

Hanap ang gitawag nilang kausaban kay daghan kanato ang buot molihok segun sa atong convenience ug sa benepisyo nga atong nadawat. Kun walay benepisyo dili magkugi.

Kun dunay benepisyo molihok bisan pa man kun sayop. Mao kini ang nahitabo sa atong nasud karon. Nahimong grey ang tanan.

Nga sa ato pa, dunay middle ground sa tanan lakip na niini ang isyu sa moralidad. Unta ang Dios wala manghinan-aw niini.

Unta molihok siya sa mas daling panahon o basin kuwang lamang ang atong pag-ampo.

Adunay tanlag apan nagpabilin kining sirado sa pagsudya.