EDITORYAL - Fire prevention sa tanang panahon
Matag bulan sa Marso ang pagtimaan sa Fire Prevention Month kay mao kini ang buwan nga matud pa magsugod ang grabeng kainit sa panahon maong daghan sab ang mga insidente sa sunog aning buwana.
Ang Bureau of Fire Protection maoy pirmeng manguna sa kampanya pagawhag sa publiko aron mag-amping sa sunog.
Apil na niini ang pagpahigayon og mga kalihokan sama sa pagtudlo sa mga tawo kun unsaon paglikay og sunog, unsay mga angayang buhaton, ug paghimo og mga plano para sa kaluwasan dili lang sa kinabuhi sa mga tawo kondili apil na sa mga kabtangan.
Ang sunog dili lamang problema sa bombero, kondili problema kini sa tanan. Numero uno gyud unta nga mangusog niini ang mismong mga lokal nga opisyales sa mga barangay kay sila maoy nasuhito sa ilang mga lugar kun hain ang fire hazards.
Daghan sa mga barangay ilabi na sa Metro Cebu nga nagdasok ug naghuot ang kabalayan halos wala nay kaagian sa mga bombero. Sanglitanan niini kining pipila ka mga barangay sa Cebu City sama sa Duljo-Fatima, Mambaling, Ermita, Suba, Pasil ug uban pa.
Ayha ra molihok ang mga opisyal pagpangusog anang pagbutang og gyud og maagian sa bombero kun naigo na sa sunog. Dili mabasol ang mga tawo nganong naingon ini kini kay mismo ang mga barangay officials wala mobadlong kanila anang pataka og tukod og mga pinuy-anan.
Pagluma-luma diay, dili ilaha ang yutang gitarukan sa ilang mga balay. Mag-angkon angkon ra man og pwesto ang mga tawo unya tukoran dayon og balay para mapuy-an.
Kun ang barangay officials dili palang unta hangol og boto sa mga tawo, dili unta ingon niana kapeligro ang kahimtang sa pagpuyo sa ilang mga tawo.
Unsaon man nga tungod lagi kay botante ug anugonan nga dili na sila suportahan sa eleksyon, paundayunan lang ang mga tawo.
Ang Fire Prevention dili unta sa bulan lang sa Marso timan-an, kondili tibuok tuig gyud kining buhaton ug dili na kinahanglang ang BFP gyud pirme ang manguna sa kalihokan.
Mahimo ra gyud nga mismo ang mga barangay officials maoy manguna sa paglihok ug imbitaron nalang ang BFP para maayo ang kalihokan og resulta.
Bisan gideklarar sa mga senador nga way balaod nga nalapas, gipahibawo ni Kardinal Quevedo nga nakahukom sila pag-uli sa tanang pito ka sakyanan aron di maduhig ang tibuok simbahan. Hinaot nga makumbinser si Quiboloy nga mas makaayo ang paggakos sa kahayag kay sa pagtago sa kangitngit.
* * *
- Latest
