Sunda ang batasan ni mayor sa pagtagad sa mga tawo

Usa sa nakita nakong hiyas ni Cebu City Mayor Mike Rama ang iyang patas nga pagtagad sa mga tawo nga moduol niya, ma dagkong tawo o kabus, pareho ang iyang pagtratar kong kinsa ang nauna maoy iyang unahon sa pagtratar pud niya sa media one call or one text away ra gyud. Gani kong makakita siya nga dunay media sa iyang buhatan moduol kini ug mao pay mohatag magpa interview kay nakasabot siya sa nature sa trabaho sa mga tigbalita nga adunay deadline nga giapas.

Apan kong unsa ka reachable ug approachable ang mayor, opposite pud kaayo ang kinaiya sa pipila niya ka mga tawo, pipila lang kay daghan man ang maayo og gawi nga nisunod sa batasan sa mayor. Labtikan nako ang gipakita sa usa ka sinaligan sa City Hall kinsa nagpakita sa iyang dili patas nga pagtagad sa tigbalita.

Ang empleyado uang gitawagan makadaghan nga higayon kay importante nga makuha ang iyang inputs sa problema karon sa panahon nga nakaapekto kaayo sa panginabuhi sa mga mag uuma. Wala siya motubag kay basin busy, giusban og tawag ug sa kataposan nitubag ug gugsto niya magpa-interview sa iyang opisina ug magpahuwat.

Naghuwat intawon ang pobreng tigbalita og usa ka oras, pag-abot niya daw wala gyud makakita sa tigbalita nga naa sa iyang atubangan nideretso sa iyang cubicle nga bisan pag-reply sa timbaya wala gyud, basic courtesy hagbong gyud siya samot na sa service with a smile.

Nagdahum ang media nga maka-interview na kay siya man ang ni-demand nga sa iyang buhatan himoon. Apan ang giuna niya og atubang ang iyang bisita nga bag-o lang niabot, nawani ang iyang gikasabot nga reporter kinsa nisabot lang kay unang giingon sa staff nga igo ra daw magpapirma sa document.

Niabot og usa ka oras, wala pa maghuman ang ilang estorya nga makita ug madungog sa media nga nag-atang kaniya nga ang ilang topic tsika nalang. Pastilan nagsige og tan-aw sa orasan ang reporter nga hapit alas tres sa hapon maapeki na kaayo sa deadline busa nilakaw nalang kay wala pa man mag-ukang ang kawani sa City Hall ug ang iyang bisita.

Asa naman ang first-come, first-serve principle or policy ani? In fairness sa reporter niadto siya sa buhatan sa City Hall official kay gipaadto ug gipahuwat, unta siya ang giuna. Kumo "reporter lang" ang iyang gikasabot pwede na niyang baliwalaon? Hinumdumi sir nga ang gihingusgan ni mayor ang partnership sa media nga maoy makatabang usab sa pagpadayag sa mga programa sa kagamhanan aron sa katawhan. Usahay ang tawo nga makahupot og pwesto gamay na ang iyang pagtan-aw sa uban.

Ok ra man unta kining opisyala sa una, apan nagkadugay nagkalami este nagkapait man nga angayan pahinumduman sa insaktong pamatasan ilabi na nga nag-aspire ang dakbayan nga mahisama sa Singapore with a touch of Australia unya ingon niini nga kinaiya ang ipakita.

Dili sa nagpaka importante ang media, apan ang kawani man mismo ang nagpahuwat kay magpa- interview unya na amnesia naman sa naghuwat kaniya nga gilangaw na. Naghago ang media sa paghuwat sa wala. Sundoga ninyo ang hiyas sa mayor kinsa naningkamot intawon nga makab-ot ang iyang gitinguha nga mag level up ang syudad apan lisod kong dunay uban nga sakop nga simang.