Ang pagtugot sa PNP nga makapanag-iya og mga semi-automatic rifles ang mga gun enthusiasts makatabang sa pagpalambo sa external defense sa atong nasud batok sa China. Kini ang panahom nga giluwatan sa presidente sa Volunteers Against Crime and Corruption (VACC) nga si Arsenion Evangelista. Mura’g gubat na man ang mindset sa presidente sa VACC. Dili lang tingale himoon nga rason ang panagbangi nato sa China aron lugakan ang rekisitos paghupot og armas. Kon mahitabo, kadtong mga adunahan sayon lang makapalit og armas; kadtong mga pobre, magmantiner lang una og plastik nga pusil-pusil. Madahaan!
Daw plakang guba
Namahayag si Presidente Marcos nga dili niya imbitahon ang International Criminal Court (ICC) aron imbestigahon si kanhi Presidente Duterte bisan pa man sa gihugon-hugon nga panagbikil sa ilang relasyon. Alang sa Presidente, hulga sa soberiniya ang ICC tungod kay giumol man ang man kini aron mahatagan og hustisya kadtong mga lugar nga walay korte nga naglihok, kahimtang nga wala mahitabo sa Pilipinas. Namulong na ang Presidente sa iyang baruganan kabahin sa ICC. Hinaut nga suportahan sa tanan ang maong baruganan aron mahilom na kini’ng maong isyu. Kadtong buot gihapon mosukwahi, daw mahisama sa plakang guba nga magbalik-balik ang tukar. Muleeng!
Dugang rekisito sa kaminyoon
Gisalikway sa Konseho sa dakbayan sa Sugbo ang giproponer nga ordinansa nga mag-require niadtong buot magminyo sa pagtanom og kahoy isip dugang nga rekisitos una sila makakuha og marriage license. Giuyonan sa konseho ang committee report nga ang maong dugang nga rekisito wala mahiuyon sa national laws sama sa Family Code ug sa Anti-Red Tape Act. Kon napasar pa ang maong ordinansa, hayan kwestyonable gihapon ang pagpatuman niini. Matud pa sa akong amigo, “Kon marijuana pa ang ipatanom, dili na kinahanglan ang ordinansa.” Fezteleern!
Edukasyon ang yawe
Gisaway ni Kongresista Janette Garin ang DepEd tungod sa pagsupak niini nga adunay mga langyaw nga manag-iya sa atong mga eskwelahan dungan ang pagpangutana nga supak ba diay ang DepEd nga mahatagan og maayong edukasyon ang mga tinun-an. Edukasyon man kaha ang yawe sa kabulahanan busa nganong ihikaw man? Mao diay nga nakaingon ang usa ka estudyante nga, “Naglibog ko sa titser, ang iningles sa pan, bred, ang iningles pud sa tulay, bred gihapon. Moundang na lang ko eskwela.” Pagkatoytoy!
Hangtud manga-opaw
Gikataho nga gibanggaan ug gipasiritan og tubig sa barko sa Chinese Coast ang barko sa Pilipinas nga gitahasan sa resupply mission didto sa Ayunging Shoal. Gihulagway sa AFP nga ang agresibong buhat sa China nga usa ka “clear and present challenge” sa Philippine Navy. Daghan na’ng higayon nga gibuhat sa China ang maong matang sa agresyon. Apan igo lang sa pagpanghimaraot ang atong mga opisyales. Hangtud kanus-a man kita moduko ug magpa-awot? Tubag sa akong amigo, “Hangtod mahurot og kalarag ang atong buhok ug hangtod nga ma-opaw na ang atong mga ulo”. Fishkots!