Alang sa mga batang babaye ang ilang amahan mao ang ilang first love. Gani sagad sa mga anak babaye mga papa's girl gyud o mas suod sa amahan kay lagi mao man ang unang gugma nila. Apan subo palandungon ang nahitabo sa usa ka tres anyos nga batang babaye nga gisuwayan sa pagkutlo sa iyang amahan ang kinabuhi niini.
Makapakitbi sa atay ug makapahilap sa kasingkasing ang nahiaguman sa bata dihang gisuwayan sa paggulgol sa amahan ang iyang liog gamit ang kusilyo. Gipukaw niya ang bata og mao kadto ang iyang gihimo ug giingnan pa nga patyon niya ang anak. Gi-live stream pa niya sa iyang Facebook ang gihimong kadautan.
Aduna pay laing video nga siya mismo ang nagkuha nga iyang gituok ang bata sulod sa gimanehong taxi nga nakaingon sa dili matungngan nga kalisang sa bata nga hilabihang singgit sa kasakit dili lang sa iyang lawas kon dili apil na sa iyang dughan ug pangisip kay ang iyang first love mao man ang nagtinguha nga mopatay kaniya.
Maayo gani kay dali nga natultolan sa kapolisan sa dakbayan sa Naga ang nahimutangan sa bata ug naluwas kini ug nadakpan usab ang amahan nga anaa na karon sa bilanggoan ug mag-atubang og kasong kalapasan sa Republic Act 7610 o Children Protection Act.
Sangko sa langit ang pagbasol sa amahan kinsa miingon nga drama lang kadto niya aron pagpanghadlok sa iyang kapuyo nga inahan sa bata nga mobalik kaniya. Apan ang iyang giingon nga drama dakong bakak kay sa linghod nga pangidaron sa iyang anak dili na madala og drama.
Problema sa pamilya ang hinungdan niini kay nagtuo siya nga nakakita na og laing lalaki ang iyang kapuyo nga nagtrabaho didto sa laing nasud nga maoy nakapadespirado kaniya ug ang bata ang gipahimungtan.
Apan matud sa inahan sa bata nga akong nahinabi sa Messenger nga tampalanan gyud diay kining amahana kay mabdos pa lang siya kulatado na siya ug sa iyang pagpanganak ug mao usab ang iyang gihimo sa bata. Naa pa ganiy higayon nga giitsa niya ang iyang anak sa karsada.
Ang batasan sa lalaki ang nagtukmod sa babaye nga moadto sa gawas sa nasud aron makalikay apan sa iyang gihimo sad wala nay kadangpan ang iyang anak sa kamot sa iyang amahan sa kadautan.
Nagbasol man ang amahan apan ulahi na ang tanan. Walay luna sa ingon niini nga tawo sa katilingban kay kon pasayloon kini ug makabuhi basin iya nang mahinaykan ang iyang anak.
Unta ang inahan makauli na aron maoy moatiman sa iyang anak. Luoy kaayo ang bata kay karon nawala ang iyang amahan ug wala usab ang inahan sa iyang kiliran.
Dili man gyud malikayan nga adunay mahitabong away sa manag-partner apan dili lang gyud iapil-apil ang mga anak ug labaw sa tanan dili pahimungtan, mamahimong wala silay ikasukol sa pagkakaron. Apan moabot ang panahon nga maila na usab ang kahigayonan nga inig tuyok sa kalibutan matiguwang ang ginikanan basin sila ang mabaslan.
Busa panggaon gyud ang mga anak kay sila ra ang kadangpan sa mga ginikanan inig abot sa pagsalop na sa kinabuhi.